WILLEMSTAD,- Teatro Luna Blou & La Tentashon ta presentá Bululú formal riba ruta di Karnaval djabièrnè 31 di yanüari nueb’or di anochi i djadumingu 2 di febrüari och’or di anochi na La Tentashon. Edion Booy (Tan Cleta), Percy Benita (Pitufo) & Germain Jansen (Ma Yeta) lo trese dos anochi karga ku susesonan ku ta pasa promé, durante i te asta despues di Karnaval. Durante di e anochi aki e tres komediantenan lo bai trese vários suseso ku ta bin bek tur aña durante di nos dushi fiesta Karnaval. Edion, Germain i Percy lo bai laga bo hari bo barika yen ora ku nan trese tur e susesonan aki den un bachi chistoso. For di preparashon pa apertura di Karnaval te despues di Karnaval. Festival di Tumba, elekshon di Prens i Pancho, Reina, Susesonan riba ruta di Karnaval, den marcha, kosnan ku ta sosodé den gruponan di karnaval i hopi mas. Bin pa bo sa ta kuantu Bululú tin riba e ruta pa Karnaval. Bin mira e personahe nobonan krea pa Edion, Germain i Percey. Tan Cleta, Ma Yeta i Pitufo lo bai ta den diskushon formal. Tan Cleta(Edion Booi) tin años ta para na Paradijs pero awor a bin dos persona mas ku ke para na e mes un kaminda ku Tan Cleta kual ta Ma Yeta(Germain Jansen) i Pitufo(Percey Benita). Ma Yeta semper a para na Pietermaai. Awor su kasa Pedro a mand’é bai marka un espasio na Paradijs paso einan ta mas trankil. Den e mes un espasio tin un otro individuo, Pitufo ku tambe ke marka e mes un espasio, ku hende òf sin hende. Nan tres ta kuminsá un pleitamentu formal. Unda tur esaki lo kaba? Wak pa bo no pèrdè Bululú Formal Riba Ruta di Karnaval djabièrnè 31 di yanüari nueb’or di anochi i djadumingu 2 di febrüari och’or di anochi na La Tentashon pa solamente naf 25,-. Karchinan ta optenibel na takia di Teatro Luna Blou. Pa mas informashon por yama 4622209. Bo por bishita nos página wèp. www.latentashon.com òf tira un bista riba facebook: la tentashon.