WILLEMSTAD- 24 di yanüari 2014 – Na ougùstùs aña pasa e popular seri Ocean Mysteries ku Jeff Corwin dirigí riba ‘wildlife’ a bin graba na Kòrsou. A graba 2 episodio kaminda Jeff Corwin a haña informashon di e trabounan ku investigadornan ta ehersé na e refnan dilanti di Curaçao Sea Aquarium. Djasabra 25 di yanüari e promé episodio lo pasa i dia 8 di febrüari e di dos episodio. E episodio ku lo pasa dia 25 di yanüari ta hiba komo titulo ‘Endangered Coral of Curaçao’ i ta kubri e trabounan di e organisashon SECORE ku ta dirigí su mes riba konservashon di refnan por medio di investigashon, edukashon i restourashon. Den e episodio aki Jeff Corwin ta haña informashon detayá di e trabounan ku investigadornan  ta kondusí i tambe di e reprodukshon di koral ku ta tumando lugá na e refnan dilanti di Curaçao Sea Aquarium. Tambe lo mustra momentu ku e ta bai den e Curasub. E Curasub ta un mini-supmarino ku kua por konosé e bida bou di laman aki na Kòrsou. E di dos episodio lo pasa dia 8 di febrüari próksimo i ta dirigí riba e peliger ku Lionfish ta nifiká pa e awanan di Karibe. E programa Ocean Mysteries ta un di e programanan number 1dirigi riba ‘wildlife’ i naturalesa ku ta keda transmití riba kanal merikano. Tur siman mas di 2 mion televidente ta sigui e programa. E programa lo pasa djasabra awor riba kanal ABC pa 10:30 am EST. Pa wak un preview di e programa bai riba e link: https://www.youtube.com/watch?list=UUXC6sv7BzwUiUTRN79WvCpw&v=6t6BEeCvMeI E episodionan di Ocean Mysteries na Kòrsou a keda produsí danki na Curaçao Tourist Board na Merka i e partnership entre Georgia Aquarium i Litton Entertainment. Organisashonnan lokal ku a kontribuí na e filmashon aki ta SECORE, Substation Curaçao, Curaçao Sea Aquarium, Lions Dive & Beach Resort, Kura Hulanda Hotel Spa & Casino, Go West Diving, Ocean Encounters i Touraçao Tourism Services.