Fundashon Musica di Aruba di Aruba Caiso & Soca Monarch ‘14

Djaweps merdia na Pirate Bay Beach Club na Korsou Stichting Musica di Aruba e tene un konferensha di prensa. Meta di esaki ta pa asina komparti ku e pueblo di Korsou ta kordialmente invita pa bini Aruba durante e aktividadnan di Caiso & Soca Monarch dianan 11,12,13 y 15 di February 2014 pa e gran final. E evento aki antes tabata e asina jama “Calypso y Roadmarch Contest. Relashonista Publiko di e evento Mark-Benson Denz a habri e konferensha pa asina splika mas di e motibu di e biahe di Stichting Musica ku ta pa un tour na diferente media y e konferensha di prensa. Sinta banda di Denz tabata Nejeska Mesman di Insel Air Curacao kende ta un di e partnernan ofisial di e festival. Insel Air ta kompletamente prepara pa asina transporta tur persona for di Korsou cu ta desea di ta na Aruba durante e festival. Pa por drenta e festival naturalmente e persona mester di su karchi y Nieuwe Post Curacao ta colabora pa asina bende e carchinan. Esaki ta algu hopi util pa tur na Korsou. Sr. Sluis di Nieuwe Post Curacao a elabora riba e proceso di esaki y unda ku hasta nan tin e servisio di entrega e ticket di entrada pa e Aruba Caiso & Soca Monarch na kas di e kliente. Presente tambe tabata Erik Jan Eman di Purple Entertainment Group. E kompania aki pa di dos anja a wordu enkarga pa Stichting Musica pa asina produsi e evento logistikamente. Eman a komparti cu e anja aki ta trata di un tereno nobo kual nan a traha un mapa detaya ku ubikashon di tur kos riba dje. Di parti di Stichting Musica mes Clyde Burke y Inky Richardson a komparti ku prensa ku ta spera un record di partisipante den e festival mirando ku ta Karnaval 60 y ta inaugurando Aruba su propio Carnival Village. Ariba e pregunta ku si tin paketenan pa e festival a kontesta ku esaki no ta e kaso pero ku Renaissance Hotel Aruba huntu ku Divi Hotels ta e hotel di preferensha di e festival y Insel Air e kompania di aviashon.
Remarkabel ta ku despues di hopi anja e festival di Caiso y Soca NO ta durante e mesun fin di siman di e Festival di Tumba di Korsou Esey ta hasi ku e pueblo di Korsou por sintie liber di biaha durante ful un fin di siman pa Aruba pa asina aprecia un magno festival. Un Danki na Setar NV, Heineken, Lotto, Aruba Bank, ATA, Post Aruba NV, Nieuwe Post Curacao, Gobierno di Aruba, Insel Air y Pirate Bay Beach Club & Restaurant