Yanüari 13, 2014 – WILLEMSTAD:  Tur hende ya kaba ta den ambiente di Festival di Tumba, i naturalmente kada patrosinador di e magno evento aki por sinti nan mes orguyoso di e trabou ku Asosashon di Músiko Kòrsou ta hasiendo relashoná ku Festival di Tumba. KFC, Subway i Pizza Hut lo duna su klientenan aun mas ‘balor’ pa nan karchi di Tumba. “Festival di tumba den transkurso di tantu aña a krese i bira un produkto ku Kòrsou por ta hopi orguyoso di dje. Pa e por sigui desaroyá i saka lo mihó di tur kreashon ku ta keda presentá mester hasi invershonnan den e festival. Sin aporte i kontribushon di patrosinadónan e espasio pa hasi e invershon aki den e festival ta limitá! Esaki mes ta un di e motibunan pa kual nos ta pone skouder bou di e proyekto aki”, esaki di akuerdo ku Sr. Randy Maurera. KFC, Subway i Pizza Hut lo tin diferente spesial pa e temporada aki, tambe klientenan por spera ku tur tres restorant lo wòrdu bon representá den Curaçao Festival Center (CFC) repartiendo diferente artíkulo promoshonal i ofresiendo klientenan oportunidat di gana premionan atraktivo. Ademas di esaki tur ku kumpra nan karchi pa bai Festival di Tumba lo risibí un kupòn ku nan por uza despues ku nan kompra na sea KFC, Subway òf Pizza Hut. Tur tres restorant lo tin premionan ‘on the spot’, públiko lo mester pidi e promo team pa un lòt òf pasa na e stènt di Subway den CFC i pidi pe. Na e stènt di Subway lo bende un selekshon spesial di e sèntwichnan mas popular for di nan menú. KFC i Pizza Hut lo tin promoshonnan durante di henter e temporada di karnaval asina por kuminsá menshoná e ‘Carnaval Bucket’ di KFC i tambe e ‘Carnaval Big Box’ di Pizza Hut. “Nos patrosinio ta nifiká muchu mas ku mira bo logo riba un pantaya grandi i kompañá e rei òf reina di tumba por medio di bo logo riba su shal. Nos restorantnan ta sinónimo di kapasidat, dedikashon i dinamismo….nos ta sinti ku esaki ta e meta di AMAK tambe, ta p’esei Festival di Tumba por konta ku nos komo un partner. Nos ‘partnership’ ta konfirmashon ku nos ta kere den nos kultura, nos tin konfiansa den nos hendenan i e produkto lokal ‘tumba’ ”, asina Randy Maurera a finalisá bisando. KFC, Subway i Pizza Hut ta manda palabranan di éksito pa tur músiko, kompositor i areglista ku lo ta partisipando e aña aki i ta invitá pueblo di Kòrsou pa akudí masalmente na CFC pa disfrutá di Festival di Tumba 2014.