…Komo parti di nan selebrashon 5 aña…

WILLEMSTAD – Renaissance Curaçao Resort selebrando nan di 5 aniversario a tene un evento komunitario na unda ku a duna un parti di Sentro di Bario Otrobanda (SBO) un ‘kara nobo’ hasiendo e aún mas atraktivo i plasentero pa tur esnan ku ta bishitá e sentro di bario.Tabata djasabra último ku un grupo di empleado di Renaissance Curaçao Resort kompañá pa un grupo di boluntario di SBO a uni forsa pa kompletá trabounan di renobashon na tantu e lokal di rekreashon, e sala prinsipal di e sentro di bario,e kurá i e kancha di basketbòl. Ademas di esaki a duna un grupo di hóben ku ta bishitá SBO e tarea pa traha un pintura ku ta ilustrá tantu Renaissance Curaçao Resort komo e sentro di bario na Otrobanda. E pintura ku mas a sobresalí tabata esun di e hóben Rudley Sambo, su esfuersonan a keda premiá i e’la risibí un estadia di un wikènt na Renaissance pa e i su famia disfrutá. Den transkurso di e aña aki komo parti di selebrashon di su promé lustro Renaissance Curaçao Resort & Casino lo sigui koperá ku sentro di bario Otrobanda den diferente aktividatnan pa mucha, hóben i adulto. Na mesun momento lo apoyá e boluntarionan di SBO den rekoudashon di fondo pa sigui drecha e edifisio den kua e sentro di bario ta situá. Ku e evento komunitario aki Renaissance Curaçao Resort ta konfirmá su lealtat na e komunidat di Kòrsou, gradisiendo pa e añanan ku a transkurí. Ademas di esaki ke inspirá otro empresanan lokal pa tambe ‘duna un man’ na instansianan ku tin kresementu i desaroyo positivo di nos hóbennan komo prioridat riba nan agènda. Renaissance Curaçao Resort ke yama danki na tur esnan ku a kontribuí na e akshon komunitario pa SBO.