Refineria ISLA ta informá ku djadumingu dia 19 di yanüari 2014 alrededor di 08.45 di mainta tres (3) empleado di Isla a sufri kemadura ora ku asfalt kayente a spat riba parti di nan kurpa. E trahadónan tabata hasi trabou pa kondishoná un interkambiador den e sirkuito di asfalt di e planta di krakeo tèrmiko TC-2 pa asina trabounan di limpiesa di e interkambiador aki por keda ehekutá. E proseso ta konsistí di “blok in” e interkambiador, despues laba ku gasoil promé, sigui pa stom i finalmente laba ku awa. Pa un motibu deskonosí, asfalt a drenta e interkambiador, i a pone ku asfalt kayente a skapa i spat riba e 3 trahadónan ku konsekuensia ku nan a sufri kemadura na entre otro garganta, kara, pechu, man i dede.Tur 3 empleado a keda transportá pa departamentu médiko di Isla i despues Sehos pa tratamentu médiko mas avansá y ta risibiendo tur atenshon nesesario di Refineria Isla. Inmediatamente a forma un tim pa hasi e investigashon nesesario pa determiná e kousa rais di e aksidente i tambe pa tuma akshonnan korektivo i preventivo.