Evento ta tuma luga diasabra awo den Aruba Entertainment Center

ORANJESTAD, Aruba Den un ambiente masha ameno mes di Carnaval, e organisadonan di e Festival di Calypso y Roadmarch infantil y hubenil a tira lot pa e evento cu ta tuma luga e fin di siman aki ainda. Pa exactamente 7:00pm a start cu e reunion na Centro di Bario Brazil. E interes ta dobel di aña pasa, unda tabatin 12 participante mientras cu e aña aki a cera cu 24 participante. E organisadonan a splica e reglanan na tur e participantenan, cu ta encera cu lo presenta tur e calypsonan prome y despues e roadmarchnan. Una bes cu e participantenan a cera conoci cu e reglanan, a bay over na trek lot pa e secuencia pa e festival infantil y hubenil. Na tur lo tin 14 participante den e categoria infantil, pa cual resultado di e tiramento di lot a saca como e prome participante lo ta Xenon Daal, sigui pa Roshendra Figaroa, Jahmani Eisden, Tashanira Rasmijn, Zyquelo Guerrero, Jayleen Croes, Ashantee Martus, Zxqu Guerrero, Prisilla Quant, Jair Dijkhoff, Xenon Orfao, Sakandi Chandler, Monique Maduro y Lacey Albus. Pa e festival hubenil lo tin 10 participante, cu lo presenta den e secuencia di Jada Mejia, Vincent Grovel, Aldwayne Brete, Rudolfo Gonzalves, Joshua Bryson, Italee Brown, Izellah Ruiz, Jake Orfao, Michael Quant y Ivienne Hernandez. E Festival di Calypso y Roamarch infantil y hubenil ta tuma luga den Aruba Entertainment Center na Dakota. E evento ta cuminsa for di 7:00PM pero porta ta habri desde 6:00PM caba y ta priminti di bira grandi e aña aki atrobe. Ta conta cu un total di 26 participante total, compaña pa Exquizit Band. Carchinan ta obtenibel caba na oficina di SAC na Dakota, sino desde e mesun dia na porta di e evento. Lo cobra unicamente 5 florin pa mucha y hende grandi lo aporta cu 10 florin pa por drenta y asina sostena SAC pa sigui engrandece nos carnaval. Carnaval di Aruba a nace na aña 1954 caba, como tal e aña aki nos ta celebra 60 aña cu anualmente pueblo ta bini hunto pa mustra nos creatividad, ambiente y folklore manera nos so por. Na aña 1955 varios club y districtonan a bini hunto pa organisa e carnaval y di eynan a eligi e prome Reina di Carnaval. E parada grandi tradicional a cuminsa desde aña 1957. Pero tabata dia 11 di november 1966 (11-11-66) pa 11:11am cu a funda Stichting Arubaanse Carnaval, SAC. Desde e tempo ey e fundacion, forma pa un grupo grandi di boluntarionan cu hopi entusiasmo, ta traha duro pa organisa e diferente eventonan cu ta atrae un publico grandi di nos mesun ciudadanonan pero tambe turistanan. Pa mas informacion di SAC y di tur evento di carnaval, subi Facebook, riba e pagina facebook.com/stichtingarubaansecarnaval.