WILLEMSTAD,- Wikènt tras di lomba pa ta eksakto, Djadumingu 12 di yanüari 6or di atardi La Tentashon, Teatro Luna Blou & RBC Royal Bank a presentá dos obra riba un anochi. Pandora’s Box na teatro Luna Blou i Ta Bo Destino den La Tentashon.E dos obra nan aki keda presentá kompletamente grátis pa algun instansha i tambe skol. E dos obranan aki a sòru pa tur esnan ku a bishita Luna Blou i La Tentashon a keda yena ku mensahe. Teatro Luna Blou ta kere ku pa medio di obra teatral tambe bo por eduká, entretené i laga un pueblo reflehá. E dos obranan aki sigur ta kumpli ku tur e tres puntonan ariba menshoná. Hopi biaha den bida nos ta tuma desishonnan ku al final ta pone ku nos ke skonde tur kos robes ku nos a hasi den un Pandora’s Box òf tin biaha nos desishonnan ta kambia nos destino por kompletu. E obranan aki ta yuda bo reflehá riba e situashonnan aki. Na final di e presentashon djadumingu último e públiko i e elenko di e dos obranan aki a hiba un diskushon kaminda vários konklushon a keda saka. Un invitashon ta bai na abo tambe pa tuma un momentu pa bin wak e dos obranan aki ku sigur ta laga bo reflehá i te asta haña solushon pa situashonnan ku ta presentá diariamente den bida. Pandora’s Box i Ta bo destino, ta dos obra ku sigur ta laga bo para ketu un ratu pero alabes ta entretené bo. Tin vários parti chistoso den e obranan aki pero tambe situashonnan dramátiko. Pandoras’s Box i Ta Bo Destino lo presentá tur djadumingu den e luna di yanüari pa solamente Naf 20,-. Pandora’s Box ta konta e historia di Jolanda un mucha muhé hopi lif pero su outoestima ta hopi abou. Neka ta su mihó amiga. Neka huntu ku Broertje ta plania pa laga Jolanda ku Kevin sera konosí ku otro. Tur kos ta kambia ora ku Neka tambe kuminsá gusta Kevin. Pero loke nan no sa ta ku Kevin tin un trouma pa hende muhé. Ta Bo Destino ta konta e historia di Wendy. Un mama soltero ku ta traha duru pa por kria i manten’é su yu hòmber Nino. Den dia e ta traha na ofisina i mas lat e ta un dama di anochi. Nino ta bayendo skol pero mirando e situashon na kas e ta disidí di bai e kaminda robes i drenta den e mundu di droga. (Durashon un ora i 15 min). Skibi pa Gedion Martina i dirigí pa Donovan Bennet. Dos obra dramátiko pero ku nan parti kómiko den dje!  Un atvertensha e dos obranan aki no ta apto pa mucha bou di 12 aña. Pa mas informashon por yama 4622209. Bo por bishita nos página wèp. www.latentashon.com òf tira un bista riba facebook: la tentashon.