Ku Gio, Dreams i Tune…

WILLEMSTAD.- Tur kos ta práktikamente kla pa dia 8 di febrüari próksimo Grupo di Karnaval ‘Premium’ presentá e jump-up di ambiente titulá ‘Neon Vibe Premium Parade’, e berdadero vibrashon di alegria den ambiente kolorido di ‘neon’. E jump up aki lo konta ku animashon di e tres dje agrupashonnan musikal di mas grandi pa loke ta trata temporada di Karnaval, Gio Fuertisimo, Dreams i Tune.

REI DI KAYA

Ku e tres bandanan aki bo tin garantia ku tur Rei di Kaya lo ta den e jump up. Komo partisipante lo bo tin chèns di jump bailando riba e animashon di Hunneley Felicia, Amos Balentien, Paul Welvaart, Dju Dju V, Luwi Jano, Igmar Lareine, Tico Balentien, Dibo Doran, Lele Gonzalez i Richi Rich. Na final dje anochi lo tin un solo ‘Rei di Kaya’, ken lo e ta?

Tur trámite ya a ser hasi pa dje forma ei garantisá tremendo ambiente durante di e jump-up. E organisashon te hasta a skohe e ruta di jump-up mas gusta. Petishon pa e pèrmit a ser hasi. E ruta tentativo lo sali for di Rijkseenheid Boulevard na altura di Coca-Cola, Schottegatweg Zuid, Schottegatweg Oost, pasa Promenade, Zuikertuintje, Rooi Catochi, Biesheuvel i bai terminá bek riba Rijkseenheid Boulevard na altura di Hòfi Biesheuvel.

KARCHI

Partisipashon na ‘Neon Vibe Premium Parade’ ta kosta solamente 45 florin i ta inkluí bo T-shirt, animashon musikal di Gio, Dreams i Tune i un pakete di konsumo. Entrante awe, djarason15 di febrüari 2014 karchi lo ta na benta na Beep Beep Rio, Servei, Mensing’s Caminada i serka tur miembro di Grupo Premium. Riba dianan 5 i 6 di febrüari lo tin entrega di T-shirt i pakete di konsumo na Because Entertainment Center. Orario di entrega lo wòrdu anunsiá despues. Kòrsou, preparábu pa un tremendo jump-up ku partisipashon di e tres bandanan mas grandi pa loke ta trata temporada di Karnaval. Bin jump i sostené nos gruponan di Karnaval. Buska bo karchi tempran pa bo no keda afó!.