KRALENDIJK- YANÜARI,2014; E biaha aki tabata turno di Plasa Leonardo Nicolaas na Noord Saliña pa risibí un ‘man’ di parti di Digicel. “Henter e idea di Bario Extraordinario ta pa huntu ku komunidat di Boneiru nos restourá parkenan, skolnan i otro fasilidatnan ku ta importante pa un desaroyo positivo i sano pa muchanan i hóbennan di e isla. Empleadonan di Digicel huntu ku boluntarionan ta duna un man na realisashon di e proyekto aki i asina demostrá ku huntu nos por hasi e diferensia”, esaki di akuerdo ku Irvinia Daantje, relashonista públiko pa Digicel Bonaire. E tim di Digicel huntu ku e boluntarionan a fèrf e kosnan di hunga i chapi henter e parke p’asina e muchanan di bario por hasi uso bèk di e parke pa e aña nobo ku nos a kaba di drenta. Manera semper ta e kaso, habitantenan di  e bario di Noord Saliña i besindario, meskos ku otro barionan ku Digicel a yega di bishitá den pasado, por a kumpra telefonnan selular i tambe diferente ‘tablet’ na preisnan di baka flaku. Hopi tabata esnan ku a bishitá e stènt di Digicel pa probechá di e ofertanan atraktivo. Un danki spesial na tur boluntario ku a koperá i tambe na Grupo Chill i JOM Gaiteros ku a duna un tremendo presentashon na final di dia. Riba foto por mira momentu ku empleadonan di Digicel tabata man na obra na Plasa Leonardo Nicolaas na Noord Saliña durante di e aktividat di ‘Bario Ekstraordinario’, por mira atras na un evento masha eksitoso.