Riba djarason, 17 di aprel, DK Motorsport BV a presentá na prensa di Kòrsou e 2nd Annual Curacao Offshore Poker Run. Eric Felix, Rudell Trapenberg i John Anthony relashonista públiko di e 2nd Annual Curacao Offshore Poker Run entre otro a hiba palabra durante di e mèrdia aki splikando Poker Run i tambe e detaye nan di e evenementu. E 2nd Annual Curacao Offshore Poker Run ta bai ta un evenementu grandi atrobe aki na Kòrsou ku lo bai tuma lugá dia 11 di mei próksimo di bándabou te bándariba.
Un Poker Run ta un evento kaminda den e kaso aki un boto òf yate ta sali for di e salida ofisial den e tempu stipulá, seguidamente e ta pasa na 5 parada, i terminá na e asina yama ‘finish line’ promé ku un tempu definí. Na kada unu di e parada nan e boto òf yate partisipante ta kue un karchi for di e bara na e parada. Despues di sinku parada e partisipante tin 5 karchi. Esaki ta su ‘man di poker’. A base di e mihó man e persona ta gana e Poker Run.
Pues un Poker Run no ta bai pa e aspekto di velosidat, i ta bai pa e aspekto di simplemente suerte. Bo por yega komo último i ainda abo por ta e ganadó apsoluto ku e mihó man di poker. E boto òf yate ganadó ku e best hand ta risibí Ang. 10.000. Tambe lo tin mas premio di Ang. 3000 pa entre otro e man mas malu. Tambe DK Motorsport BV lo hasi un donashon na final di e evenementu aki.
Kuponan ta limitá pa partisipá i preis pa partisipashon ta Ang 600 pa e captain i co-captain pa boto. Riba kada boto of yate mester tin mínimal 2 partisipante.
Boto i yatenan mester tin tur dokumentashon reglá pa por partisipá na e evenementu aki. Outoridatnan riba laman i tera lo kolaborá pa sigurá e aspekto di seguridat pa partisipante i bishitante. Durante di e trayektoria riba laman amigunan i famia ta keda invitá pa pasa na e paradanan i pa apoyá nan partisipantenan for di riba tera.
Lo tin diferente aktividat rondó di e evento prinsipal di djasabra 11 di mei. Dia 3 i 8 di mei lo bai tin dos dia di pre-registrashon na Island Waterworld pa esnan ku ta interesá pa partisipá. Promé ku esaki partisipantenan por pre-registrá tambe riba nos wepsait www.curacaopokerrun.com. Riba djabièrnè 10 di mei lo tin registrashon ofishal. Manera ya a wòrdu indiká kuponan ta limitá. Ademas lo tin un asina yama captain’s meeting riba djabièrnè 10 di mei.
E trayekto di e 2nd Annual Curacao Offshore Poker Run lo ta lo siguiente: Salida i prome parada for di Santa Cruz, parada 2 Kokomo Beach, parada 3 Piscadera, parada 4 Santa Anna, parada 5 Caracasbaai, finalisando den Spaanse Water.
Pa e evento aki ya nos tin botonan tantu di Korsou i Aruba ku a konfirmá nan partisipashon. Tambe ta dunando hopi kobertura na e evento aki via kanalnan di Poker Run di Florida. Riba Facebook (www.facebook.com/curacaopokerrun) tambe por mira diferente artíkulo interesante di Poker Run 2012 riba nos wepsait(www.curacaopokerrun.com) pa por tin un bista kon e evento aki a bai durante di aña pasa 2012.
For more info: www.curacaopokerrun.com email: management@curacaopokerrun.com