Willemstad – JCI IOBA Curaçao ta un organisashon lokal ku ta afiliá na Junior Chamber International (JCI). JCI ta e federashon mundial di lidernan entre 18 pa 40 aña ku ta dediká na trese kambio positivo den nos komunidat.  Creative Young Entrepreneur Award, mihó konosí komo CYEA, ta rekonosé, stimula, honra i selebrá empresarionan eksepshonal, i e ròl di kreatividat den nan éksito. Alabes otro meta di e programa di CYEA ta pa yuda desaroyá nos ekonomia dor di kultivá ‘entrepreneurship’. E aña aki ta e di 5 aña konsekutivo ku JCI IOBA Curaçao ta presentá ku sumo orguyo e programa aki na komunidat di Korsou. Banco di Caribe ta e spònsor prinsipal di CYEA i e aña aki ta sòru atrobe pa e premio gordo pa e ganadó apsoluto, ku lo ta un suma di 10,000 florin pa invertí den e kompania. E tema di CYEA 2013 ta: “Business Excellence – Unleash the Creativity in you”. E aña aki tambe JCI IOBA Curacao lo presentá kursonan balioso na tur e partisipantenan, ku e meta pa yuda nan logra ‘Business Excellence’ – Ekselensia Empresarial. Banda di e kursonan aki lo bai tin un kompetensia  ku e meta pa yuda e partisipantenan eksponé e konseptonan di servisio i produkto ku nan ta ofresé na komunidat di Kòrsou i internashonalmente. Si bo ta un empresario hóben entre 18 i 40 aña, bibá na Kòrsou i bo ta kere bo ta manehá bo empresa usando kreatividat pa ta exitoso, no duda mas i inskribí awor mes. E último fecha ku por inskribí pa partisipá na e programa aki ku chèns di gana 10,000 florin ta 22 di aprel, 2013. Pa mas detaye kon pa inskribí i pa mas informashon general di CYEA 2013, por fabor bishitá nos website, www.iobacyea.com. Tambe por tuma kontakto ku nos na e e-mail adrèscyea.curacao@gmail.com.

JCI IOBA Curaçao, Banco di Caribe, Korpodeko i tur sobrá spònsor, ta enkurashá tur empresario hoben ku ta presentando produktonan i/òf servisionan usando kreatividat pa partisipá na CYEA 2013.