WILLEMSTAD  – 17 di aprel 2023 – Durante di e periodo tras di lomba a tuma lugá 3 kurso mas komo parti di e programa di training Her & Bijscholingstraject Hospitality Sector. Ta trata aki di e kursonan di kòki, bartènder i weiter. Durante un seremonia ameno, un total di 19 persona a risibí nan sertifikado despues di a terminá ku éksito un di e kursonan ariba menshoná. E seremonia a tuma lugá na Maris Stella VSBO i a konta ku presensia di Minister di Desaroyo Ekonómiko, sr. Ruisandro Cijntje. E partisipantenan ku a risibí nan sertifikado huntu ku e kursistanan nobo, a yuda durante di e seremonia ku preparashon di kuminda i bebida pa di e manera aki pone den práktika loke nan a siña durante e kursonan.

E kursonan a tuma lugá den forma di un crash course ku un durashon di 12 siman. E partisipantenan na e kurso di Kòki awor por traha komo asistente di un Chef Kok. Durante di e kurso nan a siña entre otro e téknikanan básiko di preparashon di kuminda. Pa loke ta trata e kurso di weiter, nan a siña entre otro pa skucha e kliente ku atenshon, tuma pedido i sirbi e pedido. E partisipantenan na e kurso di bartènder a siña entre otro e téknika di “mix” bebida, ta servisial, disipliná i kon atendé na momentu di un keho. Ademas e kursistanan a kompletá e Personal Empowerment training ku éksito kual tabata dirigí riba desaroyo di nan abilidatnan interpersonal.

Despues di a kompletá e 12 simannan di training e partisipantenan ta sigui traha na un leerbedrijf  den sektor di hospitalidat pa un periodo di 5 luna. Despues di kompletá e 5 lunanan, e kompania lo ofresé e partisipante un kontrato di trabou basá riba su prestashon.  

E programa di training, Her & Bijscholingstraject Hospitality Sector ta resortá bou di Ministerio di Desaroyo Ekonómiko (MEO) miéntras Ofisina di Turismo di Kòrsou (CTB) ta enkargá ku ehekushon di e programa. E programa ta keda ehekutá den estrecho kolaborashon ku Ministerio di Labor (SOAW) i partnernan den sektor privá. Den e periodo tras di lomba a ehekutá training di guia turístiko, resepshonista i masashi. Aktualmente tin personanan siguiendo training di Horeca i ta pendiente pa start pronto ku kurso di “housekeeping” i leermeester pa kompanianan ku ta fungi komo leerbedrijf. Aktualmente un total di 30 kompania ta kontribuyendo na e proyekto komo leerbedrijf brindando di e manera aki e partisipantenan un oportunidat pa por haña un trabou den sektor di hospitalidat. Pa registrá pa e programa di training Her & Bijscholingstraject Hospitality Sector bai na www.curacaotouristboard.com/education/

CTB, MEO i SOAW ta deseá e kursistanan tur klase di éksito na nan leerbedrijf.