Preokupashon pa skernan den maneho gubernamental

Un biaha mas Inter-Asure por mira bèk riba un aña eksitoso, i ta mira su propio futuro tambe ku konfiansa. E aña ku a kaba ta mustra un ganashi sólido di Ang. 676.257 i un portafolio ainda mas fuerte ku e aña anterior. Pa CEO i doño Justus van der Lubbe, éksito no ta kresementu kuantitativo so, pero tambe i espesialmente un forma sostenibel di manehá negoshi. Asina por ehèmpel Inter-Assure no ta mira e kòntròlnan di Banko Sentral solamente komo un obligashon legal, pero komo e forma korekto pa hasi negoshi.  

E kompania ta konsiderá e kresementu kouteloso di ekonomia di Kòrsou, komo un señal positivo. Un preokupashon grandi ta sinembargo ku e kresementu no ta basá riba un maneho di gobièrnu konsistente, i muchu ménos sostenibel. E rekuperashon kouteloso di e pandemia di Covid-19, ta pa gran parti danki na sosten finansiero di Hulanda. Ademas e kresementu ta karakterisá pa invershonnan individual, mayoria biaha internashonal den diferente sektor manera turismo, konstrukshon, sektor nóutiko, i komersio minorista. E konfiansa den futuro ta entre otro danki na e oura di stabilidat di Kòrsou komo parti di Reino. E invershon hopi grandi di gobièrnu Merikano den ekspanshon i renobashon di konsulado, tin un influensia èkstra favorabel riba esei.   

Sinembargo gobiernunan suksesivo nunka a realisá promesanan bieu pa stimulá kresementu ekonónimo, limitá riesgonan finansiero, i drecha e skernan den maneho gubernamental. E bahada ku por mira awor den e kantidat di habitante di Kòrsou, ta e tantísimo prueba ku e skernan aki entre tantu a sak nos fundeshi sosial. Servisio defisiente pa siudadanonan, proseduranan gubernamental defisiente, mal infrastruktura, un hòspital ku ta guli asina tantu plaka te ku e ta afektá e base di nos kuido di salú; nada di esaki no ta nobo, i nada no ta drecha strukturalmente. Resultado ta ku hopi siudadano lokal no ta mira futuro mas riba nan isla stimá.

E hecho ku nos poblashon ta bira mas chikitu na kantidat, ta negativo tambe pa e kantidat di prima ku fondonan di penshun ta risibí. Esaki ta empeorá e posishon preokupante di e fondonan, manera Inter-Assure a komentá ariba kaba. Aparte di e asuntu di solvabilidat di ENNIA-Leven, Inter-Assure ta di opinion ku Fondo di Penshun di Kòrsou APC tambe meresé atenshon krítiko. Pasobra hendenan ku tin derechi di penshun no ta gana nada ku un instansha di invershon impulsá polítikamente ku ta usa e penshun komo medio pa solushoná problemanan (parsialmente) òf yuda yena pòchinan di sèn. Mira por ehèmpel e debakel na Girobank òf kompra di Hotel Plaza ku anteriormente no a haña benta. No por atvertí sufisientemente pa tuma e riesgonan mas haltu di fondonan di penshun na serio.

Miéntras hopi problema no por keda solushoná sin yudansa eksterno, nos gobièrnu ta sigui para ku lomba pa Hulanda. Asina por ehèmpel a redusí e idioma Hulandes den enseñansa na Kòrsou na un malu nesesario, ku konsekuensia grave pa hubentut di Kòrsou ku dor di esei tin ménos chèns pa sigui siña òf haña trabou. Un ehèmpel chikitu pero simbóliko tambe ta e reakshon minimal riba e oferta di marechaussee pa pone e meternan pa tèst alkohol den tráfiko na disposishon di polis na okashonnan spesial. Rara bes a hasi esaki, aparentemente pa evitá metementu di afó. Esun ku ta paga pa e pida outonomia aki, ta kompanianan di Seguro i esnan ku ta sufri daño ora hende kousa aksidente den tráfiko bou di influensha di alcohol.   

Di su parti, Inter-Assure ta pone e prinsipio sentral di un maneho sostenibel. ‘Nos ta un kompania kuidadoso,’ e CEO i doño sr. Justus van der Lubbe ta bisa. Esei ta enserá entre otro ku Inter-Assure ta konsiderá tur riesgo sigurá ku hopi atenshon. E kompania ta balorá klientenan ku no solamente ta skohe Inter-Assure pa su produktonan, pero tambe pa e bon kalidat di servisio. No ta pornada e kompania a bolbe haña un sertifikashon actuarial di Couperus Actuariële Adviesgroep. E sertifikashon ta regardá un ratio di solvabilidat di 304% i edifikashon di reservanan sólido, kombiná ku un programa fuerte di re-aseguro.