“Pa grandi ku Dam ta…e tin su sakadó”
WILLEMSTAD.- Fundashon Kultural Seú Kòrsou a presentá su kalènder di aktividatnan ayera i a duna informashon riba esakinan.
Inskripshon Kantadó Mayó
Djasabra awor, 4 di mart 2023 lo tin inskripshon pa Kantadó Mayó 2023. E inskripshon ta tuma lugá na Buurtcentrum Sta. Maria di 2 or di mèrdia pa 6 or di atardi. Partisipantenan ku na 2020 a paga pa inskribí lo no tin mester di paga e aña aki. Esnan ku a inskribí na 2020 i ku lo no partisipá e aña aki por pasa pa hasi trámite pa risibí nan sèn di inskripshon bèk.
Kantadó Mayó su anochinan preliminar ta tuma lugá riba dianan 14, 15, 16 i 18 di mart. E kordinadó di Kantadó Mayó, sra. Minthy McIntosh a indiká ku e espektativanan pa partisipashon e aña aki ta basta haltu i nan ta spera di por superá e kantidat di 71 inskripshon di 2020.
Misa
Djadumingu, 5 di mart pa 9 or di mainta lo tin un Santu Sakrifisio di Misa na Misa di Sta. Maria. Fundashon Kultural Seú Kòrsou lo asistí pa dje forma ei pidi bendishon pa e temporada di Seú 2023.
Maramentu di Lensu
Despues di Misa tur hende ta bai Club Union Boneriano kaminda e kompetensia di Maramentu di Lensu lo tuma lugá di 10 or di mainta pa 7 or di anochi. Durante dje evento lo tin bendementu di kuminda i lo tin animashon musikal. Entrada ta 5 florin pa persona.
Elekshon di Reina Seú
Dia 25 di mart lo tin elekshon di Reina Seú. Kordinadó dje evento, sr. Erickson Vicario a duna informashon riba e elekshon ku lo tuma lugá den sala di eksibishon di WTC. Huntu ku e elekshon lo tin homenahe na e baluartenan. Erickson a indiká ku ainda nan falta 2 partisipante mas pa e elekshon i e ta pensa ku esaki ta debí na e echo di reakshonnan negativo riba retnan sosial. El a enfatisá ku mester yuda motivá i enkurashá nos hóbennan pa nan partisipá.
Presentashon di Trahe
Danny Yanga, den representashon dje organisashon ku ta enkargá ku e anochi di presentashon di trahe di gruponan partisipante na Marcha di Seú 2023 a informá ku dia 5 di aprel lo tin un tremendo evento den kura di Museo Nashonal. Gruponan lo hasi presentashon di nan trahe, miéntras ku lo duna rekonosementu na diseñadó i kosedónan.