buelo direkto for di Brazil

WILLEMSTAD – 26 di yanüari 2023 – Ofisina di Turismo di Kòrsou (CTB) ta anunsiá ku e kompania di aviashon Azul prosedente di Brazil lo inisiá ku un buelo semanal direkto pa Kòrsou entrante 24 di yüni próksimo. Azul ta e aerolínea di mas grandi di Brazil den kantidat di ruta i destinashonnan ku e aerolínea ta sirbi ku un kantidat di mas di 900 buelo diario pa mas di 150 destinashon. E buelo pa Kòrsou lo inisiá for di BH Airport na e siudat Belo Horizonte den e estado di Minas Gerais. E buelo nobo ta bini komo resultado di un demanda kresiente for di e merkado di Brazil. Tambe mester menshoná e esfuersonan hasí i e bon kolaborashon entre stakeholders lokal manera Curaçao Airport Partners (CAP), Curaçao Airport Holding (CAH) i CTB.

E buelo lo ta riba djasabra saliendo Brazil mainta i e buelo di regreso lo sali Kòrsou riba djadumingu. Brazil ta un merkado kresiente pa Kòrsou i e konekshon nobo aki ta unu importante pa sigui krese e merkado. Di akuerdo ku Minister di Desaroyo Ekonómiko, sr. Ruisandro Cijntje, “nos tabatin un rekuperashon ekselente den kantidat di turista di estadia na 2022 ku un kresementu di 106% kompará ku aña 2019. E desishon pa a keda aktivo den e merkado di Brazil tabata sigur un bon desishon. Por bisa ku introdukshon di e buelo direkto aki sigur ta duna un resultado positivo for di e merkado di Brazil. Ademas e buelo nobo di Azul lo kontribuí tambe na mas konekshon di biahe pa nos pueblo lokal”.

CTB ta kontentu ku e ruta aki ku lo trese mas turista pa bin eksperensiá e produkto úniko ku Kòrsou tin pa ofresé.