WILLEMSTAD – Djadumingu último dia 15 di yanüari, A tuma lugá inskripshon pa Festival di Tumba 2023, ku en general por bisa a tuma lugá den un forma eksitoso.

AMAK ta hopi agradesido ku Partisipashon di tur Branding Partnernan i  tur parteranan, pero tambe di e forma ku tantu Radionan komo Televishonnan i Red Sosial a kubri e aktividat importante aki.

Ta bon konosí ku Covid-19 a hasi un impakto negativo grandi riba nos bida kultural i ekonómiko i ta gradualmente por nota danki Dios un mehorashon den tur sektor di nos komunidat.

Durante inskripshon di djadumingu último, vários di e agrupashonnan musikal ku den añanan anterior ta inskribí 3,4 i te hasta 5 tumba, a limitá nan mes na dos o tres tumba, debí na e tempu korto di preparashon, pero tambe teniendo kuenta ku gastunan haltu ku nos komunidat ta eksperensiá diariamente.

AMAK sinembargo ta hopi satisfecho ku no ménos ku 22 agrupashon musikal, kompañando 48 komposishon a inskribí pa kompetí pa e título máksimo di Rei o Reina di Tumba.

AMAK ta kontentu tambe ku gran mayoria di e agrupashonnan musikal ta aktivo den farándula, a partisipá na inskripshon, kisas ku un par di komposishon ménos, pero importante ta ku nan a sostené e evento kultural musikal mas grandi ku nos pais konosé.

E interes públiko tantu lokal komo internashonal ta hopi haltu i diariamente ta drenta petishonnan serka direktiva di AMAK di kompanianan ku ta kumpra un kantidat di karchi pa nan empleadonan.

Segun nos fuentenan, e nivel musikal di e komposishonnan ku ta den kontienda, ta di un kalidat hopi haltu i esei ta pone ku tur e tres dianan preliminar ta bai bira interesante.

Djaweps lo ta e fecha pa entrega letra i kontrali na añanan anterior, nos ta kere ku tur esnan ku inskribí enbèrdat lo partisipá.

Djaweps próksimo tambe durante e konferensha di prensa, lo bai duna tur detaye di e siman di Tumba, pero tambe lo bai tin apertura di e edifisionan ku ta bai karga nòmber di Harry Zimmerman i Toro Colina, tur dos di felis memoria. Tambe e bòrchi di sala Anselmus Boy Dap lo keda kambiá. Tur e bòrchinan di e diferente edifisionan aki ta un obra di arte di Giovanni Abath.

Festival d i Tumba 2023 tin tur ingrediente pa bira grandi.

Direktiva di AMAK