Willemstad – E komishon organisadó di Festival di Tumba hubenil 2023, Boldstarz, konhuntamente ku Fundashon Desaroyo Karnaval Kòrsou, resientemente a organisá un rueda di prensa den kual a kompartí informashonnan balisio relashoná ku Tumba hubenil 2023.

E edishon di Festival di Tumba Hubenil aki lo ta e di 41 edishon i ta konta ku 12 partisipante sumamente talentoso. Komo parti di nan preparashon pa e evento hubenil máksimo di karnaval, e hóbennan aki lo risibí diferente ‘workshop’ di entre otro kanto i tambe presentashon eséniko durante e temporada aki. Tur esaki, ku e meta prinsipal pa alsa e nivel artístiko di nos

tumberonan.

Festival di Tumba Hubenil lo tuma lugá dia 14 di yanüari próksimo i ta pinta di bira un espektákulo tur afó. Agrupashonnan musikal Dolce Band i tambe Excellence kada unu lo kompaña 6 tumbero riba e fecha ariba menshoná. Agrupashon Dolce Band lo kompañá Tyrese Candelaria, Shurisänn Batta, Zouk’aino Jacobs, Shadee Jamanika, Tyziano Casseres i tambe Xyandro

Anthony, mientras agrupashon musikal Excellence lo kompañá Nedion Sluis, Eugeneely, Florentina, Rotnaiseny Meulens, Railipo Martina, T’Kayley Polonius i Darlisha Valks.

E komishon organisadó, bou di guia di Fundashon Desaroyo Karnaval Kòrsou, su enfoke ta pa organisá un festival di hóben pa hóben, kaminda grandi i chikí por disfrutá di e kalidat i potensial di nos tumberonan. Pues for di awor nos ta ekstendé un invitashon na e pueblo di Kòrsou pa bishitá Festival di Tumba Hubenil, djasabra 14 di yanüari 2023 i sostené nos 12 tumberonan. Karchinan ta na balor di fl. 15.00 pa mucha i fl. 25.00 pa adulto i ta optenibel na sede di FDKK na Sambil, Mensings Caminada, 24 uur uit de muur i tambe serka tur partisipante. 

Bishitá e página di Facebook i Instagram: Tumba Hubenil Kòrsou i keda na altura di tur e desaroyonan rondó di e evento máksimo di Karnaval Hubenil.