Broederliefde i Rick Ross ku presentashon awe na Kòrsou!

WILLEMSTAD:- E situashon di tempu impredesible ta hasi ku organisashon di BLAST FEST mester a bira kreativo durante di e ultimo dianan aki. No por kore riesgo ku un palu di áwaseru ta para un evento kasi ‘sold out’ i ku artistanan kontratá i pagá pa presentá. Glennsyl “Chucho” Albertina ta komentá den nòmber di BLAST FEST ku e kambio di Parasasa pa WTC lo trese únikamente kos bon pa e fanátiko. “Nos lo transformá WTC den un ‘Indoor Festival’ meskos ku ta hasi por ehèmpel na Hulanda den Ahoy. Lo tin 3 área dividí den esun prinsipal (Main Stage) sigui pa e foodcourt i DJ’s, i tambe un Lounge Area ku tur detaye manera ku fanátikonan gusta”. Esaki ta un desishon ku tantu GA Events, Brandwer, Kuerpo Polisial i Massive Production ta sinti nan mes kómodo kuné. Mester bisa, ku for di ayera ku a hasi e menshon riba social media e reakshonnan tabata masha positivo.

Broederliefde konosí pa e.o su hitnan Alaka, Do or Die, Mi No Lob, Shelbyana, un sin fin mas i Rick Ross e kantante di Purple Lamborghini,You Only Live Twice, Here I Am i mas ta rumbo pa Kòrsou. Ámbos, ya a anunsiá riba nan retnan sosial ku nan ta sumamente entusiasmá pa bishita Kòrsou i presentá pa públiko awe dia 27 di desèmber! E karchinan ta praktikamente ‘sold out’ i ya e ultimo tanda a bai puntonan di benta. Ta invitá fanátikonan pa kumpra nan karchi i disfrutá di un ambiente ‘los’, na unda públiko por eksperensia artistanan tòp den género urban di tantu Europa i Merka. Awor den un WTC transformá pa un Indoor Festival!  Fun Miles, CTB i Digicel ta invitabo pa “BLAST FEST”. Chek bo karchi di entrada na tur punto i di benta i riba www.curacaomusicweek.com òf www.tibbaa.com