WILLEMSTAD / SOEST – En kuadro di e diskulpa ku gobièrnu hulandes ta duna awe pa nan rol durante e époka di sklabitut, kantante Brian Dekkers huntu ku Mr. Ray Bass i Kilate Tesla ke rekordá pueblo e importansia di libertat real, kual ta kuminsá den nos mente. E kantika Freedom, Brian Dekkers ke duna atenshon na e deseo di kada un di nos, pa  eksperensia libertat real den nos bida, sea ta libertat finansiero, libertat den nos abilidat di pensa i kere, of libertat pa stima i biba un bida ku propósito.

Banda di e diskulpa di gobièrnu hulandes dia 19 di Desèmber, lo lansa un aña di Konmemorashon di e Pasado di Sklabitut riba 1 di yüli 2023 te ku 1 di Yuli 2024. Aki lo duna atenshon spesial na nos pasado di sklabitut, un parti importante i doloroso ku anteriormente no a haña masha atenshon den nos historia. Den e konteksto aki, Gobièrnu Hulandes ta pone 2 mion euro na disposishon, vía fondo di Mondriaan, pa aktividat nan i inisiativa nan ku ta kontribuí na konmemorashon i selebrashon di e abolishon di sklabitut den Reino. Segun Brian, e diskulpa ta un bon promé stap, pero definitivamente no ta e úniko paso ku mester keda tuma. “E tópiko ta unu hopi delikado i importante pa nos pueblo, i ta algu ku hopi ta karga te dia djawe”, ela splika. Libertat, segun Brian, ta relata tambe na nos manera di pensa kognitivamente, unda al final, libertat real ta sinta den nos mente i e responsabilidat kon nos ta relata na esaki.

Freedom

Brian Dekkers, kantante i produktor kurasoleño, a kanta, skibí i produsí e kantika Freedom

i Kilate Tesla a kontribuí ku backup vocals. Kantante i basista kurasoleño Mr. Ray Bass, nase komo Riëndy Holder, a toka bass.

E kolaborashon entre Brian Dekkers, Mr. Ray Bass i Kilate Tesla a nase foi nan konekshon riba tereno sosial, manera desaroyo musikal i libertat di ekspreshon. “Aki nos por a haña otro, loke a resultá den un kolaborashon fruktifero,” Brian ta splika. Segun Mr. Ray Bass, Brian Dekkers ta un di e artistanan mas influensial di Kòrsou, espesialmente komo eskritor i kontribudor na e sonido kurasoleño. Algun luna pasa Brian Dekkers a lansa su EP titulá Star One, unda e vershon original di Freedom ta riba dje. Mirando e diálogo rònt di e diskulpa di gobièrnu hulandes pa nan ròl den sklabitut, Brian i Riendy a disidí di kolaborá riba e vershon aki di ‘Freedom’ ku ta enfoká riba e perspektiva kurasoleño i e norma i balor nan ku ta importante pa nos.

Pa Kilate Teslata un honor pa kolaborá ku e artista nan aki, espesialmente Brian D, kende ta un leyenda bibu ku ta un inspirashon enorme p’e. “Nos tur ta bringa riba nos mes manera pa nos libertat, unu ta bringa kontra adikshon, e otro ta pega den su pasado i otro ta oprimí pa regimen politiko”, Kilate ta splika. Segun Kilate Tesla e kantika a toka ami i tur hende ku ta skuche.  Durante e aña komemorativo di e pasado di sklabitut na 2023, Mr. Ray Bass, Brian Dekkers i diferente otro artista Hulandes Karibense lo hasi vários proyekto huntu bou di e nòmber ‘Caribbean Artist Association NL’. “Komo kolektivo di artista, nos ta forma un front uni unda nos kultura i identidat karibense ta para sentral,” Mr. Ray Bass ta splika.

Segun e artistanan, e mensahe di ‘Freedom’ ta simpel, nos mester investigá i tuma inisiativa, tuma kontrol di nos emoshon i pensamentunan i realmente gosa di bida.

Boso por sigui Brian Dekkers riba su página di Instagram @briandekkers i tambe Mr. Ray bass na Instagram @mrraybass i Kilate Tesla na Instagram @kilatetesla pa mas muzik i presentashon.