Donashon di 12.500 florin pa e renobashon di e kancha di Bolas Criollas na SGR-Groep

Siman pasá Kadanz a hasi un donashon den forma di un chèk na balor di 12,500 florin, na De SGR-Groep. Esaki ta en konekshon ku e 20 aña di eksistensia di Kadanz e aña aki, kaminda a skohe pa hasi un donashon total di 20.000 florin na diferente organisashon benifesiario. E organisashon ku a wòrdu selektá i e montante ku esakinan lo risibí, a keda selektá huntu ku e partnernan di Kadanz. SGR-Groep ta e último organisashon benefisiario, ku nèt promé ku fin di aña, ta risibí nan chèk.

Ku e donashon di 12.500 florin, De SGR-Groep ta bai drecha nan kancha di Bolas Criollas na nan lokalidat na Emmastad. E kancha di Bolas Criollas aki ta sumamente importante pa e habitantenan i tambe e tim di SGR. E ta un deporte aksesibel pa mayoría di e habitantenan i tambe esnan ku ta pasa dia einan. Tantu e esfuerso energetiko komo e reto mental di e deporte ta tene e klientenan fet, segun Edwin Baas, fisioterapista di De SGR-Groep. “Banda di esaki e klientenan ta bira hopi kontentu dor di hunga Bolas Criollas”.

Ku e donashon aki, e kancha di Bolas Criollas lo wòrdu kompletamente renobá i tambe un dak lo wòrdu agregá pa asina sòru pa poko sombra riba e kancha. Beyli Alvarez, mènedjer relashon públiko i komunikashon di De SGR-Groep, a duna di konosé ku e proyekto aki lo dura mas o menos 4 luna pa wòrdu kompletá. “Naturalmente lo tin un apertura festivo! E habitanten i begeleidersnan ta spera ansiosamente riba e apertura di e kancha i ya tin planesnan pa un kompetensia di bèrdat. Nos ta hopi agradesido na Kadanz pa por hasi esaki posibel ku e donashon aki”.

Natasha Rosaria-Devid, Direktor di Maneho di Kadanz, ta sumamente entusiasmá ku e donashon na De SGR-Groep. ” De SGR-Groep ta ofresé kuido i posibilidat pa pasa dia na kasi 500 hende ku limitashon físiko òf/i mental. Asinaki Kadanz ta kontribui pa tene e kondishon físiko i mental di e grupo aki fit, ku un spèl ku ta pas kompletamente den e kultura di Korsou.