WILLEMSTAD- 12 di ougùstùs 2022 – Ofisina di Turismo di Kòrsou (CTB) ta raportá un kantidat di 275.799 turista di estadia den e promé 7 lunanan di aña 2022. E kantidat di turista di estadia registrá  ya a surpasá e kantidat risibí na 2021 na momentu ku un total di 265 mil turista di estadia a bishitá Kòrsou. CTB ta mirando un kresementu ekselente den kantidat di turista di estadia, spesialmente for di e paisnan for di kua nos ta risibí mas tantu turista esta; Hulanda i Estádos Unídos. Tur dos merkado ta mustrando un prestashon sólido den e promé 7 lunanan di 2022. Huntu e merkadonan menshoná ta responsabel pa 70% di e kantidat di turista di estadia risibí e último periodo. Un total di 146.038 esta 53% a keda risibí for di Hulanda miéntras for di Estádos Unídos un total di 47.544 esta 17% a bishitá nos pais entre yanüari pa yüli 2022. 

Yüli 2022

Na luna di yüli un kantidat di 48.246 turista di estadia a keda risibí lokual ta 11 mil turista mas ku e kantidat risibí na yüli 2019 na momentu ku Kòrsou a risibí 37.249 turista di estadia. Ta e promé biaha ku CTB ta raportá 48 mil turista durante e luna di verano. Total e bishitantenan aki a keda 501.382 anochi riba Kòrsou durante luna di yüli kual ta un averahe di 10.3 anochi pa bishitante.

Kòrsou a risibí un total di 27.115 turista di estadia for di e region di Europa na yüli 2022. For di Hulanda 23.489 turista a keda registrá miéntras na yüli 2019 e kantidat di turista hulandes registrá tabata 16.456. Un kresementu di 43% den kantidat di turista hulandes kompará ku promé ku pandemia. E di dos merkado den Europa ku a registrá un tremendo prestashon ta Bèlgika. For di Bèlgika un total di 1.235 turista di estadia a keda risibí na yüli. For di Alemania e kantidat di turista di estadia risibí tabata 974. Di e turistanan europeo, 54% a keda den un ‘resort hotel’ (esta hotèl grandi, chikí i bùngalo).

For di e region di Nort Amérika un kantidat di 10.614 turista a bishitá Kòrsou. Di e kantidat aki, un total di 10.207 a bini for di Estádos Unídos na yüli 2022. Esaki ta un kantidat rèkert di turista di estadia prosedente for di Estádos Unídos den un solo luna. Yüli 2019, esta promé ku pandemia un total di 6.395 turista merikano a keda registrá. E prestashon di e aña aki ta un kresementu di 60% kompará ku yüli 2019. Di e turistanan aki 78% a keda den un ‘resort hotel’.

For di region di Sur Amérika un total di 6.086 turista di estadia a bishitá Kòrsou. Di e turistanan for di Sur Amérika, 43% tabata prosedente di Colombia miéntras 15% tabata prosedente di Brazil. For di region Karibe un total di 3.277 turista di estadia a keda risibí na yüli. Mayoria di e turistanan aki ta prosedente di e paisnan di Karibe Hulandes.

Na luna di yüli un total di 10 barku krusero a bishitá nos pais ku un total di 29.564 turista krusero. E prestashon realisá den kantidat di turista di estadia ta sigui surpasá e lunanan anterior. Ku luna di yüli alkansando 48 mil turista di estadia i e merkado di Hulanda i Estádos Unídos registrando respektivamente 23 mil i 10 mil turista, nos por anunsiá ku orguyo ku Kòrsou su rekuperashon turístiko ta riba bon kaminda ku otro luna di bon presentashon. Nos ta satisfecho ku e progreso realisá. Awor Kòrsou ta ofresé un variedat di ‘US branded resort hotels’ lokual ta kosechando su frutanan espesialmente pa merkado di Estádos Unídos. E esfuerso kolektivo di stakeholders lokal huntu ku nos partnernan internashonal den nos merkadonan prinsipal ta dunando bon resultado.