Ta invitá tur negoshante den Horeca pa e apertura

Pronto tur negoshante den Horeca na Kòrsou por tin e bentaha di e miembresia di Koninklijke Horeca Nederland (KHN). Djarason 27 di yüli KHN en koperashon ku Curaçao Restaurant Association (CRA) ta organisá un presentashon riba futuro pa ku Horeca na Kòrsou. Esaki ta ensera tambe ku lo lanta e organisashon nobo KHN-afdeling Curaçao. Durante e presentashon e direktor di KHN Sr. Dirk Beljaarts ta duna informashon tokante e kolaborashon di KHN i CRA i tambe lo splika e bentaha nan di un miembresia di KHN pa tur Horeca na Kòrsou.  Tur negoshante den HORECA ta invitá pa ta presente. Esaki ta ensera Truk’i Pan, Hotel, Apaprtamento turistiko, Café, Bar, Snèk ets.

KHN i CRA a hiba diferente konbersashon ultimo tempu pa traha riba un kolaborashon. Esaki a resultá ku KHN i CRA ta lanta KHN afdeling Curaçao. Dia 28 yüli 2022 lo tin firmamentu di e dokumentonan pa kual esaki lo bira realidat. Promé ku esaki  lo tin un presentashon duná dor di Sr. Dirk Beljaarts pa miembronan di CRA i tambe interesado nan ku tin negoshi den Horeca, tokante e bentahanan di un miembresia di KHN.

Na Kòrsou, turismo ta birando e pilar ekonomiko mas importante. Esei ta pone mas eksigensha den e sektor di Horeca. Miembresia di KHN por bira un yudansa enorme pa sigui profeshonalisa esaki. Empresarionan ku ta djoin KHN por probecha di diferente aspekto: kontesta riba preguntanan relashona ku Horeca, konseho riba nivel personal, kuida interes general, regla deskuento serka provedornan di Horeca I informashon riba trend nan nobo, desaroyo i reglanan den e sektor di Horeca.

Despues di 2 aña lo evalua e kolaborashon i lo stipulá si esaki a trese lokual e dos organisashon aki a spera.

Presentasho pa empresarionan den Horeca – Djarason 27 di yüli

10:00 or:          Yegada i bon biní dor di CRA

10:15 or:          Presentashon di direktor di KHN Sr. Dirk Beljaarts

11:15 or:          Pregunta

12.00 or:          Final

Lugá
Acoya Curacao, Dr. Hugenholtzweg Willemstad, Curaçao