esta promé ku pandemia

WILLEMSTAD- 16 di yüni 2022 – Ofisina di Turismo di Kòrsou (CTB) ta raportá un kantidat di 35.813 turista di estadia pa luna di mei. Ku e kantidat aki, luna di mei 2022 a yega na 98% di e kantidat registrá na mei 2019 esta promé ku pandemia, na momentu ku un kantidat di 36.386 turista di estadia a keda risibí. Mei ta konosí komo un luna slo pero e prestashon registrá na luna di mei ta mustra klaramente ku Kòrsou su rekuperashon turístiko ta sólido. Di e 35.813 turistanan risibí, un total di 60% a bini for di Europa, 14% for di Nort Amérika, 15% for di Sur Amérika, 8% for di Karibe i 3% for di sobrá paisnan di mundu. Pa dia, un kantidat di 1.155 turista di estadia a keda risibí. Huntu e turistanan risibí na luna di mei a keda un total di 328.243 anochi riba Kòrsou.

For di Hulanda nos a risibí 18.868 turista, kual ta 20% mas ku na luna di mei 2019 esta promé ku pandemia. For di Alemania, 939 bishitante a keda risibí miéntras for di Bèlgika 659 bishitante a keda risibí. E kantidat di turista di estadia risibí for di Bèlgika ta 57% mas kompará ku mei 2019 esta promé ku pandemia na momentu ku un kantidat di 419 turista a keda registrá. E kresementu for di Bèlgika ta un efekto direkto di e buelo dos biaha pa siman ku Air Belgium for di Brussels. Di e turistanan europeo, 57% a keda den un ‘resort hotel’ (esta hotèl grandi, chikí i bùngalo) na luna di mei.

For di Estádos Unídos un kantidat di 4.761 turista a keda risibí na luna di mei. Pa loke ta trata Canada, e total di turista risibí na mei tabata 352. Pues total nos a risibí 5.113 turista for di Nort Amérika. Di e turistanan prosedente di Nort Amérika 68% a keda den un ‘resort hotel’.

For di region di Sur Amérika un total di 5.327 turista a keda risibí. Di e turistanan aki un total di 2.297 esta 43% ta prosedente di Colombia. Miéntras 740 esta 14% a bishitá nos for di Brazil. For di Sürnam 526 turista a keda risibí kual ta 10%. Un total di 55% di tur e bishitantenan prosedente di Sur Amérika a keda den un ‘resort hotel’. For di region Karibe, Kòrsou a risibí 2.738 turista di estadia na mei, primordialmente for di e paisnan di Karibe Hulandes.

Na luna di mei un total di 8 barku krusero a bishitá nos pais ku un total di 28.362 turista krusero.

Sifranan yanüari te ku mei 2022

Total Kòrsou a registrá 190 mil turista di estadia for di yanüari te ku mei 2022. For di Europa un total di 124 mil turista a keda risibí. For di Nort i Sur Amérika e kantidat registrá tabata respektivamente 31 mil i 21 mil turista. Nos paisnan bisiña den Karibe a sòru pa 9 mil turista den e periodo menshoná. E progreso pa yega bèk na e nivel di prestashon promé ku pandemia ta kanando den bon direkshon. Den e promé sinku lunanan di aña nos a yega na 93% di e kantidat registrá durante e promé sinku lunanan di 2019 na momentu ku Kòrsou a risibí 203.845 mil turista di estadia.