Direktiva di Curaçao Beverage Bottling Company (CBBC) i e sindikato BONECO resientemente a ekstendé i renobá nan CAO te ku aña 2025.

“E kontenido di e CAO ta moderno i duradero’, segun e lider sindikal di BONECO sr. Koense. E ta kontinuá: ‘Teniendo kuenta ku e desaroyonan aktual riba tereno ekonómiko lokal i internashonal, e kombersashonnan no tabata fásil tur biaha pero ku konfiansa, transparensia i union nos a sa di sali afó. Tantu e direktiva di CBBC komo BONECO ta konvensí ku esaki ta un progreso pa tur e trahadónan di e fábrika di refresko.’ Sr. Andrew Pinedo, Direktor general di CBBC ta añadí ku: ‘Apesar di tempunan difísil e organisashon no a invertí solamente den ‘upgrade’ e kompania, pero tambe a sigui hasi esaki den su personal, alfinal ta nan ta e kurason di e organisashon.’

140 aña den servisio

Ku miembronan di personal ta satisfecho di por traha na CBBC, ta notabel tambe den e kantidat di hubilarionan poné den spotlait durante di e okashon festivo akí. Ta trata di e koleganan Fenly Sebelon, Charlton Poulo i Mikel Wederfoort ku a kumpli 25 aña den servisio. Eric Paulina i Robert Daantje ku a kumpli 30 aña laborando den e empresa i Edwin Thielman ku a selebrá 35 aña di servisio na Coca-Cola.