Di 7 pa 12 di yüni awor konsentrá na Otrobanda
WILLEMSTAD – Djamars dia 7 di yüni awor Velas Latinoamérica 2022 (VLAC 2022) ta ranka sali 8 or di mainta ora defensa Hulandes ta risibí e barku Cuauhtémoc di Méksiko ku tirunan di saludo na entrada di haf di Kòrsou. Despues mas barku di bela grandi, e asina yamá tallships, ta drenta haf di Kòrsou.
Hopi lo rekòrdá e evento di VLAC na 2018 kon e diferente barkunan aki tabata ‘dòrna’ henter bahia di Santa Ana, huntu ku marina real Hulandes. VLAC 2022 ta un demostrashon grandioso di barku for di diferente pais di e kontinente Merikano. Meskos ku 4 aña pasá nan ta hasi un gira rònt e parti di Latino Amérika, e biaha aki en konekshon ku e di 200 aniversario di marina di Brazil. Di parti di defensa Hulandes lo tin tambe e barku di transporte Pelikaan, e supmarino Dolfijn i botonan di Wardakosta.
E evento ta kuminsá djamars dia 7 di yüni i ta dura te djadumingu 12 di yüni kaminda lo tin hopi aktividat eksepshonal den haf, riba e barkunan i na Awasá. Riba e djamars ei mes lo tin presentashon na Awasá di e asina yamá ‘Taptoe’ di Koninklijke Marinierskapel 8 or di anochi.
Den e siguiente dianan tin ora ku por bishitá e barkunan ku tur lo ta mará na e parti di Otrobanda. I pa e anochinan a perkurá pa aktividatnan kultural i musikal. Skolnan lo bishitá e barkunan riba sierto oranan. Ta bai tin parada di bandera di e diferente paisnan representá. Ta bai tin ponementu di krans na estátua di Pedro Luis Brion. Un selekshon di futbolista di tripulashon di e barkunan bishitante lo topa riba tereno di Jong Holland na Mundo Nobo kontra un selekshon di Kòrsou. Durante nan estadia e tripulantenan lo ta enkargá tambe ku proyektonan na benefisio di komunidat di Kòrsou. Marina Real lo tin un sekshon kaminda ta demostrá parti di nan ekiponan i duna demonstrashon riba tera i den haf tambe di nan aktividatnan riba laman.
Djabièrnè anochi dia 10 di yüni Koninklijke Marinierskapel lo presentá atrobe na Awasá i nan lo kompañá tambe e kantantenan lokal Merietza Haakmat i Tamara Nivillac. Tin tambe na Awasá un presentashon di e banda popular ERA. Djasabra anochi 11 di yüni for di 8 or tin presentashon di Efrem J, siguí pa un banda internashonal ku ta kompañá Alberto Barros ku su salsa for di Colombia loke ta bira e kulminashon di e programa musikal.
Djadumingu dia 12 di yüni e evento ta sera ofisialmente ora baha e bandera di VLAC 2022 i ku un desfile di e barkunan ora nan sali for di haf di Kòrsou alo largu di kosta sùit di Kòrsou pa sigui pa nan siguiente destino.
Tur esaki a bira posibel danki na hopi spònser, manera e grandinan Curaçao Ports Authority, Koninklijke Marine, MEO, CTB, Massive, Fundashon Bon Intenshon, Jet Air, Curoil, MCB, Renaissance, Penha, IBIS Management i Distribiier.