2023 Kòrsou lo partisipá pa promé biaha na Serie del Caribe

WILLEMSTAD- 13 di mei 2022 – Resientemente a tuma lugá firmamentu di un akuerdo di patrosinio entre Ofisina di Turismo di Kòrsou (CTB) i Federashon di Beisbòl di Kòrsou (FEBEKO). E akuerdo ta enserá ku pa un periodo di 3 aña CTB lo duna e federashon un aporte finansiero pa por yuda kubri gastu di partisipashon na torneonan internashonal. Firmamentu di e akuerdo menshoná ta forma parti di CTB su strategia di promoshon di turismo pa medio di deporte. E akuerdo a keda firmá pa sr. Hugo Clarinda, direktor athunto di CTB i sr. Jedrek Magdalena, presidente di FEBEKO. E firmamentu di e akuerdo a tuma lugá den presensia di Minister di Desaroyo Ekonómiko, sr. Ruisandro Cijntje.

Ademas, pa por logra mas promoshon pa Kòrsou pa medio di deporte, Minister Cijntje a logra yega na akuerdo ku e komité organisadó di Serie del Caribe pa próksimo aña na febrüari 2023, Kòrsou partisipá pa promé biaha na Serie del Caribe. Esaki sigur ta un logro grandi mirando ku ta trata aki di un kampeonato prestigioso den mundu di beisbòl ku fanátikonan partikularmente den region di Latinoamérika i Karibe. FEBEKO lo ta enkargá pa forma e ekipo ku lo representá Kòrsou durante e kampeonato importante aki.

CTB ku sosten di Gobièrnu di Kòrsou ta sigui ku su strategia di promové turismo pa medio di deporte.