Djaweps 12 di mei ta Dia Internashonal di Kuido. Riba e dia akí nos ta dediká atenshon i ta duna balor na bruder- i zùsternan, i tambe otro empleadonan den sektor di kuido pa nan kontribushon den kuido di salú.

Curacaosche Bond van werknemers in verplegende en verzorgende instellingen (CBV) ta bai selebrá e dia akí den grandi, komo muestra di gratitut pa e trabou i empeño di tur bruder i zùster i otro dunadónan di kuido durante e pandemia di covid-19 di último 2 aña.

“Ta un bon momentu pa para ketu na e profeshonalismo di nos empleadonan den kuido, i e eksperiensha ku nan ta pasa aden kada dia di nobo. Di dia i anochi nan ta traha ku dedikashon pa yuda otro hende rekuperá nan salú, i pa atendé esnan ku mester di kuido. Nos ta haña esaki un meta noble, pa kua nos ta mustra nos apresio”.

“Den mi bista no ta eksistí un profeshon mas bunita. Mi por traha ku hende i ta pasa den momentunan kontentu, pero tambe tristu. Mi trabou tin diferente aspekto i mi ta eksperenshá diferente situashon. Ta hopi bunita pa por kuida un hende tur dia i guia e persona durante su proseso di malesa”, sigun Annaliza Mathilda, presidente di CBV.

CBV ta invitá tur miembro pa selebrá Dia di Kuido. Di 8’or di mainta te12’or anochi tin müzik, kuminda i bibida, di manera ku esnan ku tin warda tambe por pasa pa selebrá. Pa realisashon di e selebrashon akí mester di hopi koperashon i sosten di miembronan. ENNIA ta spònser e dia akí.

Dia di Kuido ta riba fecha di nasementu di Florence Nightingale. E señora akí tabata un enfermera ingles di guera ku a traha durante guera di Krim ( 1853 – 1856 ). E tabata determiná pa aliviá sufrimentu di e heridonan i esnan ku tabata muriendo. El a bringa hopi pa mehorashon di e kuido.

Su akshonnan tabata komienso di Krus Kòrá, i ta konsider’é fundadó di enfermeria moderno.

Dia di Kuido ta un bon oportunidat pa pone tur héroe den enfermeria i kuido den spòtlait.

Potrèt: Annaliza Mathilda, presidente di CBV i Lesley-Ann Harms-Brodie, CEO di ENNIA.