Patrosinio na kurso di Lesa i Skibi pa hóben i adulto

WILLEMSTAD: Resientemente Banco di Caribe a hasi un bishita na Fundashon Pro Alfa i a keda impreshoná di mira diferente hóben i adulto partisipando den e proyekto ‘Un oportunidat mas’. Fundashon Pro Alfa tin un tarea masha importante den komunidat i esaki ta balapena menshoná. E meta prinsipal ta pa prepará tur kliente di e organisashon pa integrá dignamente den komunidat i partisipá den e proseso laboral. Segun sifranan di Ofisina Sentral di Estadístika (CBS), tin 671 hóben di 15 pa 24 aña – for di e 11,660 hóbennan na Kòrsou- ku ta buskando un trabou, pero ku nunka a sigui un enseñansa avansá. Mirando kon alarmante e situashon ta, Fundashon Pro Alfa a inisiá e proyekto ‘Un oportunidat mas’. E proyekto ta den su promé aña, pero ya kaba ta dunando fruta.

Segun gerensia di Banco di Caribe, “Edukashon di un komunidat ta sumamente importante i e proyekto di Fundashon Pro Alfa meresé nos kontribushon. Hóbennan di Kòrsou mester ta prepará pa partisipá den proseso laboral, i si na e promé intento esaki no a bai, tin un oportunidat mas. Meskos pa e adulto; nunka ta lat pa siña”.

‘Un oportunidat mas’

E meta di Fundashon Pro Alfa ta pa prepará hóbennan i yuda nan desaroyá nan abilidat básiko i sosial, di manera ku nan por drenta sektor laboral. Aki mester pensa riba un edukashon básiko di lesa i skibi, idioma, abilidat di fishi, kurso di bankete, kòki, asistente di kushina, abilidat pa traha ku kòmpiuter, atministrashon i hopi mas. Den henter e trayekto amplio aki, Banco di Caribe a skohe pa patrosiná e kursonan di lesa i skibi. Banco di Caribe a skohe pa pone enfasis riba e trayeko aki mirando ku ta mashá importante pa un poblashon tin dominio básiko di lesa i skibi. E dominio básiko aki ta fundeshi di enseñansa den nos komunidat i sigur ta abri porta pa entre otro trabou pa e grupo aki. Por tuma nota riba e imagennan ku hóben i adulto ku a pasa e fase di lesa i skibi, fásilmente a sigui pa e otro trayektonan menshoná.

Tokante Fundashon Pro Alfa

Fundashon Pro Alfa a keda fundá na aña 1989 ku enfoke riba alfabetisashon general di nos komunidat. E fundashon no tin ganashi. Pa 35 aña e grupo meta di e fundashon ta analfabetonan. Na Pro Alfa nan ta risibí guia riba formashon personal, sosial i laboral. E proyektonan ta den ‘full swing’ pero ainda Fundashon Pro Alfa tin hopi nesesidat finansiero. Banco di Caribe ta enkurashá otro instansia i empresa ku ta interesá pa duna un man, pa tuma kontakto ku Fundashon Pro Alfa na number di telefon 462-7985, via di WhatsApp 698-4185 òf ‘e-mail’ adrès proalfa252014@gmail.com pa aportá na un trayekto di ‘Un oportunidat mas’.