…di dos luna konsekutivo den aña 2022

WILLEMSTAD- 14 di mart 2022 – Ofisina di Turismo di Kòrsou (CTB) ta raportá un kantidat di 35.451 turista di estadia pa luna di febrüari. Di e 35.451 turistanan risibí, un total di 69% a bini for di Europa, 17% a bini for di Nort Amérika, 8% for di Sur Amérika, 3% for di Karibe i 2% for di sobrá paisnan di mundu. Pa dia, un kantidat di 1.266 turista di estadia a keda registrá. Huntu e turistanan risibí na luna di febrüari a keda un total di 357.327 anochi riba Kòrsou.

For di Hulanda nos a risibí 21.624 turista, kual ta 25% mas ku na luna di febrüari 2019 esta promé ku pandemia. For di Alemania, 849 bishitante a keda risibí miéntras for di Bèlgika 736 bishitante a keda risibí. Di e turistanan europeo aki, 58% a keda den un ‘resort hotel’ (esta hotèl grandi, chikí i bùngalo) na luna di febrüari.

For di Estádos Unídos un kantidat di 5.492 turista a keda risibí na luna di febrüari. Pa loke ta trata Canada, e total di turista risibí tabata 593. Esaki ta nifiká ku nos a risibí un total di 6.085 turista for di Nort Amérika. Di e turistanan prosedente di Nort Amérika 69% a keda den un ‘resort hotel’.

For di region di Sur Amérika un total di 2.980 turista a keda risibí. Di e turistanan aki un total di 1.168 esta 39% ta prosedente di Colombia. Miéntras 591 esta 20% a bishitá nos for di Brazil. Un total di 54% di tur e bishitantenan prosedente di Sur Amérika a keda den un ‘resort hotel’. For di region Karibe, Kòrsou a risibí 1.194 turista di estadia na febrüari, primordialmente for di e paisnan di Karibe Hulandes.

Na luna di febrüari un total di 40 barku krusero a bishitá nos pais ku un total di 43.601 turista krusero.

E kantidat di turista di estadia registrá na febrüari tabata mas ku na luna di yanüari partikularmente for di Estádos Unídos. E progreso pa yega bèk na e nivel di prestashon promé ku pandemia ta kanando den bon direkshon. Tur e esfuersonan ku ta keda hasí pa registrá un prestashon positivo di e sifranan di turismo ta un kolaborashon entre stakeholders lokal huntu ku nos partnernan internashonal. CTB ta antisipá ku e lunanan benidero lo ta muchu mas positivo mirando ku awor no mester hasi tèst di Covid mas ora ta biaha pa Kòrsou.