Formando parti di komunidat, pa komunidat.

Brièchi ta parti importante di nos kultura, meskos ku nos platonan krioyo, dushi músika i tambe nos monumentonan bunita. Riba 1 di mart 2022 Landsloterij a kumpli 70 aña di eksistensia ku ta motibu sigur di selebrashon. Si para ketu na  fecha akí, e tin un nifikashon hopi mas profundo ku djis konmemorá 7 dékada di eksistensia.

Loterianan a eksistí pa hopi aña riba e islanan den reino Hulandes. Por bai bèk for di komienso di siglonan 20 kaminda gobernadó tabata duna pèrmit pa weganan di azar na organisashonnan privá ku nan meta tabata rekoudá fondo pa yuda esnan ménos privilegiá den komunidat.

Institushon

Riba 15 di òktober 1949 gobièrnu a firma e “loterijverordening” di Landsloterij i na 1951 el a bira operashonal. Riba 1 di mart 1952 Landsloterij a organisá su promé sorteo bou di direkshon di temporal di señor Gustave Miguel de Jongh.

E organisashon a keda fundá ku e meta pa organisá loteria a fin di generá fondo pa karidat. Un meta derivá adishonal tabata pa krea entrada pa rebendedónan di ménos of sin rekurso. Metanan ku te awe Landsloterij a keda fiel na dje i ta sigui kumpli kuné dunando trabou na un total di 600 rebendedó  na Kòrsou, Aruba, Bonaire i Islanan ariba ku diariamente ta subi kaya pa bende nan brièchi na e pueblo .

Reto di afó
Manera a premirá, bendementu di brièchi tabata kana bon i no tabatin un sorteo kaminda brièchinan tabata sobra. Den transkurso di algun aña a disidí di oumentá e kantidat di brièchinan na benta. Un desishon demasiado optimista ya ku e brièchinan no a bende manera a spera. Ta bini aserka ku e influensia di loterianan di afó ketu bai tabata forma un kompetensia fuerte, prinsipalmente esnan na Venezuela ku tabatin premionan monetario hopi atraktivo. E tendensia akí a kontinuá te na fin di añanan 60.

Tempu pa reahustá
Durante añanan 70 i 80 a hasi algun ahuste den kantidat di brièchi i premionan lantando asina e interes. Por a nota un kresementu positivo.

Landsloterij tabatin vários medio na su disposishon pa stimulá benta i a usa nan ku éksito den añanan 80. A introdusí premio di mei mion florin i tambe pa promé biaha un premio di 1 mion florin. Na fin di dékada 80 a asta trese un premio espektakular di 2 mion florin huntu ku un brièchi nobo yama “pia largu”. E brièchi akí tabata konsistí di 20 pida na balor di 10 florin pa pida òf un hinté pa 200 florin. “Pia largu” no a resultá un éksito i a disidí pa stòp kuné.

Era di digitalisashon

Dékada 90 i unmilenio nobo a trese su retonan nobo pa Landsloterij, e interes pa brièchi tabata bahando drástikamente i konsiente di e situashon a bini ku diferente medida i ideanan pa generá ganashi ku fin p’e bai bèk den komunidat. A ahustá e skema di premio hasiendo e premio mayó 200 mil florin, introdusí un Jackpot i premionan èkstra manera un outo.

Den e añanan 2000 a bai pone mas atenshon na publisidat di e loteria i outomatisashon. Alabes a lansa Landsloterij su wèpsait (www.landsloterij.org) kaminda e kumpradó por mira e resultadonan di sorteo riba mes un dia.

Un bachi nobo.
Landsloterij a sigui move ku avansenan global i drentando den añanan 2010 bini ariba a skohe pa hasi kambionan konsiderablemente grandi.  Por a nota  un ‘branding’ diferente ku logo renobá i kolónan vibrante, skema di premio nobo ku mas di e sorteonan gustá di mei mion i 1 mion florin, a bini bèk ku un sorteo kombiná di premionan yamá i derivá tresiendo un kantidat di 4800 premio adishonal pa aña. Alabes a introdusí premionan èkstra manera plaka kèsh i korementu di garoshi den supermarket pa hasi e sorteo mas atraktivo.

Internamente tambe a outomatisá e proseso di bendementu di brièchi na rebendedónan. Komunikashon ku públiko a bira mas aksesibel via medionan sosial i a introdusí un “Brièchiscan’ kaminda por skèn e brièchi ku un ‘smartphone’ komo alternativa banda di wak e resultadonan den korant.

Progreso ta kasi imposibel sin kambio. Ta danki na retonan surpasá i kambionan konstante den direkshon di mehorashon ku awe Landsloterij por selebrá orguyosamente e fecha importante akí. Prinsipalmente pasobra mei mei di tur e transformashonnan el a sòru semper pa kumpli ku su meta prinsipal. Esta di ta un loteria nashonal ku ta kontribuí na e progreso di komunidat ku integridat, transparensia i rèspèt.

Landsloterij ta gradisí na promé lugá pueblo di Kòrsou i e islanan den Reino Hulandes pa kere den brièchi, kumprando segun na forsa. Tur su 600 rebendedónan ku ta forma parti integral den éksito di e loteria riba e islanan. Tambe staf, personal, kolaboradónan, tur èks trahadó i direktornan ku a kontribuí na su 70 aña di eksistensia.

P’e motibu akí ta bai selebrá den grandi huntu ku e islanan. Kuminsando ku un sorteo riba di 10 mart 2022 ku premio mayó di mei mion florin i tambe 7 premio adishonal di 7000 florin. Alabes Landsloterij ta invitá un i tur pa keda pendiente pa diferente kampañanan  sumamente interesante ku tin na kaminda relashoná ku e selebrashon.

Sigui nos riba tur nos kanalnan di “social media’, televishon, radio i korant p’asina bo tambe toka parti na e gran selebrashon akí di 70 aña Landsloterij.

At’abo sa, awor nos t’ei selebrá!