ENNIA ta spònser Terrence Agard, ganadó di medaya di plata pa estafeta di 400 meter (2021) te na weganan Olímpiko 2024. Esaki ta duna Terrence espasio pa enfoká kompletamente riba su kompetenshanan di atletismo pa loke ta e parti di 400 meter i estafeta 4 x 400 meter.

Huntu ku Liemarvin Bonevacia, Tony van Diepen i Ramsey Angela, Terrence ta forma parti di un tim di atleta eksitoso. E éksito ku nan a logra na Tokyo nan ke sigui kuné durante añanan binidero. Durante weganan Olímpiko na Tokyo, Terrence a kore e velosidat mas rápido despues di e ganadó (43.76 sekònde) Solamente e merikano Rai Benjamin a kore su dilanti. Despues di e kompetensha Terrence a deklará ku el a hinka alma i kurpa den e kareda akí.

ENNIA ta sostené Terrence Agard ku su preparashonnan i programa di kompetensha na kaminda pa weganan Olímpiko na Paris den 2024. Pa e aña akí tin na febrüari Nederlands Nationaal Kampioen Indoor, na mart Indoor World Cup Belgardo, na yüli World Cup na Oregon, na ougùstùs European Cup na Munchen i na òktober Odesur Games na Chili.

Lesley-Ann Brodie, CEO di ENNIA:”Nos ta hopi orguyoso di por kontrubuí ku e partnership akí na prestashon di Terrence, i indirektamente na prestashon di su tim di estafeta. Su esfuerso, dedikashon i prestashonnan internashonal ta un bòn ehèmpel pa nos tur. E ta duna nos speransa i orguyo. Huntu ku su tim e ta pone e parti karibense di Reino Ulandes di un bunita forma den spòtlait. Esaki nos por logra solamente dunando Terrence e konfiansa ku su pueblo ta pará su tras.”