Un kulturista, artista, promotor, defensor, perkushonista ku ta dominá vários instrumènt tradishonal di e area di músika afro-kurasoleño. Esun ku e tabata dominá mas tantu ta tambú. El a studia diferente man di tambú [estilo di toka] di diferente tokadó di renombre i a desaroyá su propio man: e man sagrado di Ompi Tio.

Ompi Tio ta un tambulero ku a kompañá griòtnan kurasoleño ora nan ta resitá. E ta un troubadour ku a kana ku su instrumènt i manda e mensahe kultural bibu bibu pa mucha, hóben i adulto.

Ompi Tio ta un tokadó ku a toka den práktikamente tur género musikal, tambú tradishonal, moderno, seú, kantika di trabou, tumba, ritmonan afro-karibense i jazz. E tabata e promé kompañé di e gran griot Ali Inecia. Ku su retakanan e tabata aksentuá e ritmo di poema i kuentanan rítmiko di Inecia.

Ku su trabou komo perkushonista perfekshonista e tabata sostené i yuda karga baile i drama kurasoleño i karibense. Ku su repikenan riba su tambú e tabata krea un hamaka pa karga literatura kurasoleño: narashon, proza, kantika, poesia i kuenta.

Te na su morto por konsiderá Ompi Tio un “living human treasure”. Asina UNESCO ta propagá pa gobièrnunan kuerdo duna rekonosimentu na baluartenan ku ta dominá sierto area di kultura. Spesialistanan ku mediante di nan konosementu, téknika i abilidat práktiko ta yuda preservá i konservá e herensia kultural tangibel i intangibel di pueblo.

UNESCO KORSOU ta denominá personanan asin’akí komo “Kargadó di Kultura”. Ta un lástima ku Ompi Tio no t’ei mas i ku lo no por papia mas di un “living human treasure”, sinembargo e tabata i ta keda un kargadó nato di kultura. Su legado ta loke e ta lag’ atras: esnan ku el a inspirá, esnan ku tabata sigui su pasonan den silensio. Su legado ta su nòmber, su memoria i su produkshonnan, e simianan ku el a planta i tur rekuerdo ku ta karga su marka.

Na Kòrsou ta kargadónan di kultura individual ta e úniko fuentenan ku ta yuda kuida, mantené i desaroyá Kòrsou su kara kultural. Ompi Tio tabata un di e fuentenan akí.

Kòrsou ta keda un di e poko paisnan na mundu ku konsientemente a skohe pa mantené su pueblo den un krísis eterno di identidat.

Raymond ‘Monsu’ Justiana laga tur bo slanan den kèm di e barí keda dualu manera kumbu den shelu di Kòrsou pa yuda tene luchadónan pa kultura na belero. E lucha ta sigui.

Ompi Tio sosegá na pas.

Dedikatorio di parti di

Museo di Tambú Shon Cola

René V. Rosalia