Investigashon: enfoke riba hende ta hiba na rendimentu

WILLEMSTAD – Resientemente BDO Dutch Caribbean a organisá su promé kurso di kapasitashon riba e aspekto humano den Maneho di Kambio (Change Management). Vários tabata e kompanianan ku a registrá pa tende tokante di Prosci, un di e métodonan mas usá na mundo, i ku a demostrá di ta duna resultado eksitoso. Covid a obligá hopi empresa pa kambia, pero na hopi okashon ta lubidá riba ‘e hende’. Sinembargo investigashon ta mustra nos ku e aspekto humano ta un faktor krítiko di éksito den Maneho di Kambio. Ku su sosio internashonal, BDO Dutch Caribbean a bira un outoridat riba e tereno aki. Un di e konsehonan ta ku, “No únikamente esnan meimei den e organisashon, pero tambe esnan na tòp mester profundisá riba e aspekto humano di kambio.”

Hopi interes pa un promé seshon di kapasitashon

Resientemente BDO a brinda un seshon di kapasitashon di 3 dia pa profeshonalnan riba e método di Prosci. E asina yamá Prosci Practitioner Training a tuma lugá na Marriott ku entrenadó Erik Steketee di The People Side Of Change, un partner prinsipal di e organisashon mundial Prosci. Binti (20) mènedjer di kompanianan lokal ku ta keda impulsá pa kambio a asistí. E interes tabata haltu i e feedback hopi positivo. BDO ta konsiderá esaki un señal positivo den bista di e boluntat di desaroyo empresarial na Kòrsou.

Un método ku ta funshoná

E método di Prosci ta basá riba investigashon i ta ofresé un plan stap-pa-stap ku hèrmèntnan inteligente ku kual hende i organisashon por kambia ku éksito i efikasia. E método i e hèrmèntnan ta funshoná pa motibu ku nan ta basá riba investigashon, nan ta holístiko i fásil pa usa pa kualke tipo di kambio. Prosci ta mundialmente konosí pa e ‘modelo ADKAR’ ku ta guia personanan i organisashonnan mediante kambio. Poniendo enfoke riba e aspekto humano, resistensia ta keda minimalisá i progreso aselerá.

Top Management tin un papel klave

Na hopi okashon maneho di un kompania ta delegá e trayekto pa maneho di kambio, i esaki ta hasi ku e kambio deseá hopi bes no ta keda alkansá. Ta hustamente na e nivel di mas haltu, ta na unda mester sá kiko ta tumando lugá, i karga e kambionan manera berdadero ‘leaders of change’. P’e motibu aki BDO lo invitá managernan na e nivel di mas haltu pa partisipá próksimamente na kursonan di kapasitashon spesífikamente dirigí na nan.

BDO ta kontinuá

E asesornan ku vishon di BDO Dutch Caribbean tambe ta ‘change practicioners’ sertifiká, i ke kompartí nan konosementu ku klientenan i tur ku ta interesá, mediante konseho, kapasitashon i sertifikashon. Di e manera aki BDO ta duna un aporte na konstruí e aptitut di kambio na Kòrsou i ofresé sosten na profeshonalnan ku ta atendé ku e materia.

Pa mas informashon

Gerd Glaudemans, managing partner di BDO Dutch Caribbean ta invitá komunidat empresarial pa tuma kontakto i deskubrí mas tokante e aspekto humano di maneho di kambio. Fin di yanüari 2022 BDO lo organisá konhuntamente ku Erik Steketee algun seshon mas pa sertifikashon di e Prosci Practicioner Training.