Kòrsou Transparente tin un direktiva nobo. E direktiva nobo lo traha pa sigui promové aun mas tantu, pa konsientisá riba e konsekuensianan dañiño di un komportashon no-étiko i koruptivo na Kòrsou. E fundashon tambe lo sigui vigilá e implementashon di e rekomendashonnan di Transperency International, ku a keda presentá 8 aña pasá.

Ademas di e presidente Michael Hernandez, e direktiva nobo ta formá pa Angelique Sanches-René, Anthony Weber, Yamilette Emerenciana, Elvira Statie, Eugène de Lannoy i Jeannette van Geest. E hunta di konseho di e fundashon ta formá pa Eric Smeulders, Astrid Strijk i Nelly Schotborgh. Presidente Michael Hernandez ta satisfecho ku a amplia e direktiva: “Nos direktiva ta formá di diferente profeshonalnan ku amplio konosementu i eksperensia. Asina’ki nos por akapará un públiko muchu mas amplio pa oumentá e konsenshi rondo di e tópiko di transparensia i e lucha kontra korupshon. Pa un isla chikitu nos ta sinti i mira mesora e dañonan kousá pa korupshon. Esaki ta krea un kompetensia inhustu i pago di soborno ta oumentá nos preisnan. Serka hendenan mas i mas ta realisá ku korpushon riba diferenta area ta dañiño pa nos pais i tin gran disposishon pa stòp esaki.” E fundashon ta preparando aktualmente 2 debate tokante transparensia i e inter-relashon entre“boven- en onderwereld”. E relashon aki ta asina serka di otro kaminda kriminalnan ta hasi uso di servisionan di “e bovenwereld” pa nan aktonan, ku ta wòrdú kategorisá komo “ondermijning”. Banda di esakinan e fundashon ta desaroyando aktivdatnan ku ta dirighí riba hóbennan.

Tambe Kòrsou Transparente lo sigui konsentrá riba e implementashon di e rekomendashonan for di e rapòrt di Transparency International.  Nelly Schotborgh, ken e tempu ei tabata e investigador prinsipal di e asèsment pa Kòrsou, a indiká ku den e último añanan e la mira ku e organisashonnan relevante a kuminsá traha riba e rekomendashonnan aki aya, pero “ahinda tin hopi ku no a wòrdú atendé i ku esakinan meresé atenshon”.

Presidente Hernandez ta señalá ku e enfoke di e fundashon riba konsientisashon riba e efektonan di korupshon i e importansa di transparensia durante e último tempunan a wòrdú dirigí riba e hubentut, paso esaki tin un efekto mas duradero. Pa e motibu aki e fundashon lo bin ku muchu mas inisiativa pa sigui stimulá e konsenshi aki bou di nos hóbennan. Hernandez: “Kòrsou realmente mester realisá su mes ku integridat, transparensia i kontabilidat ta hopi importante. Esakinan ta pilarnan importante pa nos ekónomia i sosiedat den su totalidat.” Pa mas informashon tokante di e fundashon i su aktividatnan, por sigui e pagina di Facebook www.facebook.com/KorsouTransparente òf manda un email na korsoutransparente@gmail.com.