Rotterdam – Den e dianan benidero, diferente partido polítiko na Hulanda lo publiká nan lista di kandidato definitivo pa elekshon munisipal 2022. Djasabra último D66 Rotterdam a publiká nan lista kaminda e hóben yu di Kòrsou, Duer Dania, a ser presentá komo kandidato number 10.

Duer ta un hóben ku na 2008 a sali Kòrsou pa bai sigui estudio avansá na Hulanda. Despues di a optené e diploma bachelor den Media & Entertainment Management na Hogeschool InHolland, el a kuminsá  traha na Kas di Kòrsou na Den Haag komo kolaboradó di Komunikashon i Informashon. E hóben aki nunka a stòp di desaroyá su mes. Despues di a traha na Kas di Kòrsou pa por lo menos tres aña, e la skohe ba pai hasi algu totalmente diferente: Duer a kuminsa un reto nobo komo konsehero den e área di informashon i proseso pa un kompania di software. Den e ròl aki e tabata responsabel pa proyektonan pa diferente munisipio i ministerio na Hulanda. Aktualmente e ta traha komo kordinadó di proseso pa un ministerio Hulandes.

Paso pa polítika munisipal
Durante di su estudio, Duer a kore stage na entre otro Tweede Kamer der Staten-Generaal, kaminda e la traha ku frakshon di partidonan Hulandes hopi di serka. Ta hustamente den e sentro di demokrasia aki su interes polítiko a nase. No solamente e interes pa sa mas di polítika Hulandes, pero tambe di un dia por representá i ta e bos di Hulandesnan Karibeño bibá na Rotterdam; pues Rotterdam ta un di e munisipionan di Hulanda ku mas habitante di orígen Hulandes Karibeño. Segun Duer ta hustamente pa esaki ta importante pa tin un represente ”Antiano” den konseho munisipal (gemeenteraad) di Rotterdam: “Komo habitante di Rotterdam nos bos tambe ta konta. Mi ta boga pa ta e brùg entre Hulandesnan Karibeño i konseho munisipal di Rotterdam i tambe e bos pa asina logra pone puntonan di interes importante riba agènda di konseho munisipal. Un yamada urgente ta bai for di awor na tur ”Antiano” bibá na Rotterdam: boso vota ta bal hopi! P’esei mart próksimo, por fabor hasi uso di boso derechi di voto. No lubidá ku sin di kada un di bosnan su sosten, nunka un representate skohé dor di boso lo no drenta konseho munisipal”.