WILLEMSTAD- 11 di novèmber 2021 – Resientemente Ofisina di Turismo di Kòrsou (CTB) a organisá un bishita edukashonal pa agentenan di biahe for di 3 siudat na Colombia esta Bogotá, Medellin i Cali. Meta di e bishita tabata pa e agentenan di biahe mes bin eksperensiá e produkto ku Kòrsou ta ofresé di manera ku nan por bende esaki na e kolombianonan ku ta skohe pa bin bishitá nos pais. E bishita di 5 dia a konta ku partisipashon di 50 agente di biahe for di Colombia.

E programa pa e agentenan di biahe a inkluí entre otro; bishita na diferente hotèl di interes pa e merkado di Colombia, bishita na atrakshonnan turístiko, rekorido den trolley train pa konosé e aspekto históriko di nos sentro di siudat Willemstad, Netto Bar pa nan purba e konosido ròm bèrdè, trep pa eksplorá e área di Banda Abou, bishita na galeria di Nena Sanchez i bishita na playa Kenepa Grandi i Playa Piskadó. E programa a keda klousurá ku un trep riba boto kual a finalisá na playa Marichi.

Na final e agentenan di biahe a ekspresá di ta kontentu di por a bishitá Kòrsou i eksperensiá e produkto ku Kòrsou ta ofresé. Un danki ta bai na Corendon Mangrove Beach Resort, Curio by Hilton, Sunscape Curaçao Resort, Kunuku Aqua Resort, Avila Beach Hotel i Curacao Marriott Beach Resort, e atrakshonnan turístiko ku a forma parti di e programa i e kompanianan ku a hasi e parti di transporte; FBTT Taber Tours, Fiesta Tours, Rumba Tours i Irie Tours. CTB ta sigui invertí den e tipo di programanan aki ku e meta pa oumentá e kantidat di turista di estadia pa Kòrsou.