Promé konsepto di ‘Listening Party’ na Kòrsou

WILLEMSTAD/ Resientemente a tuma lugá e ‘Listening Event’ titulá ‘Becoming’ di e hoben artista B’Jay. E evento totalmente bendí, a keda bon organisá i a kumpli ku tur regla stipulá pa e tempu ku nos ta bibando den farándula. Durante di e ‘Listening Event’ ku a tuma lugá na Fusions invitadonan por a kome i bebe algu miéntras nan tabata e promé pa skucha e produkshon di B’Jay! Shen fanátiko atento a skucha e kansionnan nobo ku ta forma parti di e produkshon ku e siman aki ta keda estrená. Fanátikonan a papia palabra klá i a duna aprobashon total pa e produkshon bai laira!

E siman aki B’Jay ta estrená su promé produkshon riba kual ta figurá 15 kansion. E produkshon titulá ‘Becoming’ ta konta e trayekto di kresementu di Bjorne, for di mucha pa hoben, di hoben pa adulto i awor artista solista. Bjorne ta konstantemente den proseso komo hende i komo artista, esaki mes ta hasi ku e por keda sorpresa su fanátikonan. ‘Becoming’ a keda skibí kompletamente pa Bjorne, mesklá pa Efrem Mambi i Masterisá pa Sean Cannister. Ademas, ta figurá produktornan Whala, SE7EN, Pastor i QNTN. Ademas, di solisitá e track(nan) na bo radio faborito, por stream ‘Becoming’ di B’Jay riba iTunes, Spotify, Tidal i Apple Music.