DI UN FORMA RESPONSABEL “Union  ta e yabi pa solushon”.

WILLEMSTAD — Direktiva di AMAK ta sumamente satisfecho, ku despues di mas ku un aña i mei di lucha, porfin ku despues di e diferente akashonnan di último simannan, kontaktonan personal ku miembronan di e tim di krísis, intervenshon di parlamentario Gibi Doran, programanan farandulero radial, porfin huma blanku a sali.

Pa mas ku un aña i mei artistanan a keda privá, di por a ekspresá nan mesa den un òf otro forma di arte o pa ehersé nan labor.

Den e situashon aktual no ta kestion di skor pa logronan personal, pero e mensahenan komun ku konhuntamente  tabata bin dilanti di e diferente gruponan di interes, sigur a krea un bon impreshon, serka esnan ku tin ku tuma e desishon.

No por keda reuní pa diskutí e diferente proposishonnan pa kobertura di e sektor farandulero, pero a yega e momento pa tuma desishon, i habri e sektor di un forma responsabel, kaminda tur esnan ku ta envolví, inkluso músikonan i artistanan, pa karga nan responsabilidat, pa nos por sigui tene e sifranan di kontagio abou.

Mester evitá pa demasiado aglomerashon, i mantené aplikashon di reglanan di higiena.

Durante e konferensha di prensa di awe mainta, promé minister sr. Gilmar Pisas, tabata fuerte i firme ku ekspreshonnan al kaso, i tambe mester duna rekonosimentu tambe na tur esnan ku a hiba palabra i tambe miembronan di prensa, ku den un forma al kaso a reakshoná, riba e desishonnan ku gobièrnu a tuma.

Ta bon pa enfatisá e bon trabou ku e tim di krísis a desplegá, pa awor aki e pandemia di Covid na Kòrsou , ta bon kontrolá.

Ounke te ainda tin sierto restrikshonnan pa esnan ku no ta ful bakuná, tòg ta bin un alivio pa e situashon vigente ku a kousa reves finansiero pa músikonan i artistanan i trahadónan den horeca.

E hecho ku gran parti di e pueblo aki a bakuná, sigur lo a kontribuí ku e kontagio di e sifranan di Covid a keda abou.

Pa e motibu aki direktiva di AMAK ta konsehá tur músiko i artista pa mas tantu posibel bai bakuná. Si enbèrdat na momentu ku 85% di nos poblashon ta bakuná, esei por krea e komunidat sano i salú, ban hasi uso pa duna posibilidat pa bakuná sin tin kosto mará na dje, pa nos aktividatnan farandulero por bolbe reanudá den forma responsabel.

Finalmente Direktiva di AMAK ke felisitá tur nos músikonan i artistanan ku e logro aki, i nan mes momento hopi éksito pa futuro kompromisonan.

Ban mantené positivismo, hasi bon uso di nos kreatividat i responsabilidat durante di e periodo di “Post Covid” aki, i ban spera ku aki 3 siman, durante e reunion di evaluashon di gobièrnu, nos por konstatá ku e resultadonan di Covid a keda abou, pa di e forma ei Kòrsou por sigui biba den un ambiente saludabel den e normal nobo.

Direktiva di AMAK