Riba Dia Mundial di Turismo

WILLEMSTAD- 27 di sèptèmber 2021 – Dia Mundial di Turismo ta keda selebrá tur aña riba dia 27 di sèptèmber i tin komo ophetivo pa promové e importansia di turismo i su balor sosial, kultural i ekonómiko. Riba e fecha aki, Ofisina di Turismo di Kòrsou (CTB) a skohe pa lansa e trayekto di introdukshon di turismo na skol di fundeshi. Turismo ta un di e pilarnan importante pa ekonomia di nos pais. Pa e motibu aki introdukshon di turismo komo materia na skol di fundeshi ta imperativo. Lansamentu di e trayekto a keda hasí pa Minister di Desaroyo Ekonómiko,  sr. Ruisandro Cijntje huntu ku Minister di Enseñansa, Siensia, Kultura i Deporte sr. Sithree van Heydoorn i sr. Hugo Clarinda, direktor athunto di CTB. E lansamentu a konta ademas ku presensia di representantenan di Ministerio Ekonómiko, Ministerio di Enseñansa i di e diferente direktivanan di skol. Lo introdusí e materia turismo hasiendo uso di videonan interaktivo kombiná ku un buki di tarea pa asina e muchanan por siña tur e diferente áreanan di e industria di turismo. Durante di e evento tur presente a haña e oportunidat pa mira e promé video ku próksimamente lo bai skol.

Introdukshon di turismo komo materia na skol di fundeshi lo yuda amplia nos muchanan su konosementu riba e materia di turismo. Lo kuminsá primeramente ku grupo 5 pa despues sigui pa grupo 6 i 7. Turismo ta un sektor dinámiko ku ta brinda hopi posibilidat. Ademas introdukshon di turismo na skol di fundeshi lo kontribuí tambe pa lanta interes di nos muchanan pa skohe e direkshon di turismo na momentu di hasi un eskoho pa nan estudio riba nivel sekundario.

Komo parti di e trayekto lo sigui próksimamente ku seshonnan di informashon pa kabesnan di skol i dosentenan. CTB ta gradisí tur ku a kontribuí na realisashon di e trayekto aki partikularmente  Ministerio di Enseñansa i e diferente Direktivanan di Skol. Ta importante pa for di un edat hóben nos muchanan sera konosí ku turismo i siña ku turismo tin futuro aden.