…i ta introdusí stashon pa karga vehíkulonan eléktriko di kliente

WILLEMSTAD: Banco di Caribe a bin ta kana un trayekto ‘bèrdè’ pa algun tempu. Esaki ta visibel den tur área di duna servisio na banko, hasiendo su operashonnan mas sostenibel. Awe, ta dal un otro paso grandi den e direkshon ei. Tin mas i mas preokupashon ambiental, no únikamente na Kòrsou sino rònt mundu. Banco di Caribe ta masha kontentu di por a konta ku e profeshonalismo di Dynaf pa guia e proyekto di gran impakto aki den e direkshon di ‘era bèrdè’. Resientemente a kompletá e trayekto na unda a instalá kasi 850 pènel solar riba edifisionan di Banco di Caribe na Schottegatweg, Otrobanda i Sta. Maria. Ademas, a atkerí dos vehíkulo eléktriko i a instalá un ‘EV Charging Station’ pa sirbi klientenan ku ya kaba tin un vehíkulo eléktriko.

“Un desishon pa bai ‘bèrdè’ no ta keda tumá di awe pa mañan. Banco di Caribe tin dos aña riba e trayekto aki pa di un manera inovativo tuma e pasonan korekto den teknologia i energia ‘bèrdè’. E satisfakshon di por duna inisio na un era nobo pa nos banko ta yena nos ku húbilo i inspirashon pa sigui”, esaki di akuerdo ku CEO di Banco di Caribe, sr. Fons Simon. Esaki aun mas na momento ku sr. Hans van der Gulik, CEO di Dynaf a remarká ku Banco di Caribe ta e promé banko na Kòrsou ku tin pènel solar riba su edifisionan.

Ku e invershon spesífiko aki, Banco di Caribe ta redusí gastu di utilidat i redusí emishon di karbon. Esaki ta adishonal na tur e método i práktikanan ekológiko ku Banco di Caribe a bin ta tuma manera redukshon di papel den diferente di su servisionan. Di e manera aki banko ta konsientisá tur kliente pa hasi uso di BdC Online pa hasi nan transferensia ku ta mihó pa nos medio ambiente i  ta envolví ménos gastu pa nan mes. Uso di energia konsiente i efisiente i uso di produktonan ‘bèrdè, manera vehíkulo eléktriko ta algun manera mas kon Banco di Caribe ta kontribuí na salú i bienestar di empleadonan i nos komunidat. E benefisionan pa nos medioambiente ta numeroso.

A instalá ‘EV Charging Station’

Banco di Caribe a instalá un ‘EV Charging Station’ pa tur kliente ku ya kaba a adoptá e práktikanan ‘bèrdè’. “Ta nos kontribushon na klientenan ku a tuma e paso pa huntu ku nos ‘bai bèrdè’. Banco di Caribe ta spera di por ta un inspirashon pa mas empresa kuminsá orientá riba e posibilidat i benefisionan di e práktikanan aki,” asina sr. Simon a kontinuá bisando. Hopi hende ya kaba tin un vehíkulo eléktriko, i pa esnan ku kisas tin un poko duda ta importante pa investigá e benefisionan. Asina por menshoná ku por ehèmpel ora bo manehá un vehíkulo eléktriko bo ta kontribuí na redusí gastunan di transporte di bo pais, bo ta yuda bo pais alkansá metanan ambiental, i ta redusí bo propio gastunan di outo, gasolin, servisio i mas. Banco di Caribe ta gradesido na Dynaf pa e instalashon profeshonal di tantu e pènelnan solar komo e stashon di karga vehíkulo eléktriko. Dynaf ta un kompania renombrá ku ta spesialisá riba e tereno aki. Tabata Djaweps último ku Banco di Caribe a introdusí e stashon di karga vehíkulo eléktriko pa kliente,   a klousurá e eksitoso trayekto na unda a instalá e pènelnan solar na su edifisio prinsipal i filialnan.