Resientemente JCI Willemstad a lansa e website ofisial di JCI su “Conference of America” ku lo tuma lugá di 18 pa 21 mei 2022 aki na Kòrsou.

JCI Conference of America ta un evento ku ta wòrdu organisá anualmente pa un di e diferente organisashonnan di JCI den área di Karibe i tambe Sur i Nort Amérika. E meta di e konferensia ta pa trese huntu miembronan di JCI di e parti di mundu aki, i organisá training, reunionnan tokante lokual ta pasando den kada pais, aktividat sosial pa konosé mas di e kultura di e pais organisadó i pa sigui forma lidernan..

E konferensia di 2022 ta wòrdu organisá pa JCI Willemstad, un di e 5 organisashonnan lokal ku ta forma parti di JCI Dutch Caribbean. E konferensia lo por konta ku partisipashon di mas o ménos 400 pa 500 miembro di JCI di rònt mundu, pero prinsipalmente di e área di Karibe, Sur i Nort Amérika. Esaki no ta promé bes ku JCI Willemstad ta organisando e konferensia aki. Na 2011 tabata último bes ku esaki a ser organisá na Kòrsou i a konta ku partisipashon di alrededor di 600 pa 700 partisipante, bishitando nos isla pa aproksimadamente 5 dia i kontribuyendo na nos ekonomia.

Ku lansamentu di e website, JCI Willemstad ta duna potensial partisipantenan mas informashon di Kòrsou i tambe oportunidat pa por registrá i keda na altura di desaroyonan rondó di e konferensia. E konferensia ta habri pa personanan ku no ta miembro di JCI tambe i ta un bon oportunidat pa siña konosé JCI na e nivel internashonal i tambe netwerk ku personanan internashonal i lokal.

Den e periodo binidero nos lo sigui informá nos komunidat tokante di e konferensia i ta konta ku komunidat di Kòrsou lo biba ku nos i nos bishitantenan. Pa mas informashon, por bishita e website jciconferencecuracao.com