Tèk Team eksperensiá den traha hit ta hisa buta

KRALENDIJK/ Miéntras ku mundu di farándula ta riba un ‘semi-hold’ agrupashonnan musikal, kompositor i kantantenan ta sigui move i hasi nan máksimo esfuerso pa mantené presensia den merkado. Esei mes t’e kaso di Fenty ku nèt promé ku ‘lockdown’ a anunsiá maneho nobo i kontratashon di kantantenan p’e banda ku a pasa di Fenty Music, pa Fenty 4 Life i awor pa Fenty den un temporada relativamente kòrtiku. Miéntras ku e detayenan aki ta puramente ‘tékniko’ loke si ta hopi interesante ta e piesa ku Fenty a lansa den kolaborashon ku CaTiPa i Decoded.

E front di e banda konsistiendo di Ron, Capella i MJ ta un base sólido pa e próksimo tempunan. E piesa titulá ‘Sosegá’ interpretá pa MJ tin netamente esei tambe, un bon vibrashon i un aire fresku p’e banda.  “Sosegá” ta un komposishon di Url Isenia & Dan Dan, Areglo di CaTiPa, Mixing di Efrem Mambi, i Mastering di Sean Cannister. Interesante hasi menshon ku e piesa ta keda lansá ku un videoclip tambe ku a keda graba dor di Casimir Roosje. MJ ta lansa e piesa aki despues di su hit “Tene Mi Man” (Studio Version) 216K views riba Youtube, i un otro 268k views pa e Live Version riba Youtube. “Tene Mi Man” tambe a keda produsí pa Url Isenia & Dan Dan. Miéntras fanátikonan ta warda ku hopi entusiasmo p’e banda por kuminsá toka bèk, por stream e piesa nobo online riba youtube i riba tur streaming platforms.