Ounke e medidanan ta un sla pa aktividatnan farandulero, ban usa e 3 simannan benidero, pa nos pensa riba  e forma mas efisiente i korekto pa nos kontinuá

Direktiva di AMAK a tuma nota di e medidanan ku gobièrnu a tuma relashoná ku e desaroyonan alarmante di Covid 19 ku hopi atenshon.

E medidanan aki sinembargo no ta muchu alentador.

E situashon aki ta kousa ku músikonan i artistanan un biaha mas ta keda privá di por a ekspresá nan mesa den un òf otro forma di arte o pa ehersé nan labor.

E sifranan di kontagio di Covid-19 durante último simannan a oumentá di un forma drástiko i e situashon den CMC tambe ta di preokupashon.

Durante un enkuentro via di e sistema di “zoom” dia 11 di ougùstes 2021, Amak i KIF a ser poné na altura di algun di e medidanan, durante e konferensha di prensa 12 di ougùstùs, nos a tuma nota di e limitashon di 100 persona den un lokalidat i e toke de keda despues di 12’or.

Direktiva di Amak tin komprenshon ku mester frena e situashon di e variante di Covid aki, sinembargo nos a pidi e sifranan real ku ta duna indikashon, ta na ki aktividat o sitio e kontagionan a tuma lugá.

Ta bèrdat ku nos tabatin sigur dos evento grandi, ku por sierto a tuma lugá konforme tur e reglanan stipulá pa gobièrnu, pero durante konferensha di prensa e minister di GMN, a hasi e menshon di fiestanan grandi ku a tuma lugá i ku posiblemente ta kousa di e sitashon aktual di kontagionan haltu.

Mester bin klaridat di parti di nos outoridatnan, pa pueblo sa ta for di kua aktividatnan, e kontagio ta tuma lugá.

Es mas si na e momentonan aki no ta pèrmití bailamentu, anto esei ta duna e impreshon, ku ta e bailamentu ta e problema mayó. Un punto sigur Ku Amak ta kuestioná ta e hecho, ku di un dia pa otro ta bin ku e anunsionan pa sera e sektor farandulero, poniendo ku e músiko diripiente ta keda konfrontá ku e situashon, di no tin entrada.

Pero laga nos tur ku ta metí den e sektor farandulero, ban analisá kiko ta e puntonan ku kisas nos mester mehorá, pa evitá ku kada biaha, ta dal e sektor sera.

Si pa motibunan personal, bo no a bakuná ainda, kisas despues ku bo hasi bo propio evaluashon, bo por tuma e desishon, pa ban hasi esaki tòg.

Mundialmente nan ta imponé restrikshonnan pa esnan ku no a bakuná, pero aki na Kòrsou esey ainda no ta e kaso.

Pa e motibu aki direktiva di AMAK ta konsehá tur músiko i artista pa mas tantu posibel bai bakuná. Si enbèrdat na momentu ku 85% di nos poblashon ta bakuná, esei por duna posibilidat pa nos aktividatnan farandulero por bolbe re-anunda den forma responsabel, ban hasié.

Finalmente Direktiva di AMAK ke deseá tur esnan ku ta interná aktualmente na CMC pa entre otro Covid 19, un pronto rekuperashon.

Ban mantené positivismo, hasi bon uso di nos kreatividat durante di e periodo di inaktividat aki i ban spera ku mas pronto posibel e kontagionan por baha, pa di e forma ei Kòrsou por rebibá den un normal nobo den un forma responsabel.

Direktiva di AMAK