WILLEMSTAD- Dia 16 di desèmber 2021 Maduro & Curiel’s Bank ta konmemorá e hecho importante ku MCB ta sirbiendo e komunidat di Kòrsou pa 105 aña.

Durante e próksimo lunanan i asina kana yega na e fecha konmemorativo na desèmber, MCB ta bai duna èkstra atenshon na nos komunidat, kliente i koleganan pa medio di diferente proyekto i evento. Kada luna nos lo tin un òf mas aktividat pa aksentuá nos apresio i gratitut na komunidat di Kòrsou.

Pa ranka sali ku e temporada di konmemorashon 105 aña, MCB ta djòin Curadoet e aña aki un biaha mas. MCB ta rekonosé ku Curadoet ta e aktividat di boluntario di mas grandi den nos komunidat i nos lo bai kontribuí huntu ku Curadoet ku siguiente proyektonan :

• Banko ta duna un aporte finansiero na 10 organisashon ku ta traha riba kuido i edukashon di mucha i hóbennan riba nos isla.
• Mas ku 105 boluntario di nos banko lo ta aktivo na 4 diferente organisashon riba djasabra 31 di yüli durante di Curadoet 2021
• Nos ta bai duna un “facelifting” kompletu na Fundashon Bai Bini na Kwartier. Esaki ta enserá fèrf paden i pafó i duna un man pa limpia den kura di e Krèsh.
• Banko lo sòru pa e edifisio di  Casa Manita haña un kara nobo. 
• Nos boluntarionan ta bai fèrf hinter e edifisio di Fundashon Elias ku ta situá na Boka i tambe pone un plenchi di wega.
• Banko lo kuminsá drecha e kònteiner na Kolegio Maria Auxiliadora den kual “Leerorkest Curaçao” ta ópera. Tambe nos lo pone  un toke musikal rònt di esaki.

Di e manera aki MCB lo sigui kontribuí  i sigui mustra gratitut durante e próksimo lunanan trahando riba diferente proyekto na benefisio di nos komunidat.

MCB ta konsiente ku mundu hinter ta pasando den un periodo ku diferente reto pero trahando HUNTU nos lo sali afó. Awor mas ku nunka nos tin di duna otro un man i sigui kana huntu… pa un mihó mañan!