Un skohensia lógiko i inovativo pa klientenan ku tin ‘hamber’ pa  mihó data

Willemstad, Curaçao – Digicel a anunsiá resientemente ku e’la yega na un akuerdo ku Loret Group, un kompania ubiká na Guadeloupe i tambe ku Caribbean Fibre Holdings pa  kumpra un nètwèrk di submarine fibre pa henter region Caribense. Digicel lo kumpra Middle Caribbean Network, Southern Caribbean Fibre, Antilles Crossings i un sierto kantidat di otro propiedat di Global Caribbean Fibre. E akuerdo aki ta hasi Digicel propietario di un nètwèrk kompleto di submarine fibre optic cable di aproksimadamente 2,100 kilometer ofresiendo un kapasidat for di Trinidad pa Guadeloupe. Ademas di esaki Digicel a drenta un negoshashon ku Global Caribbean Fibre i Global Caribbean Network pa proveé kapasidat di submarine fibre for di Guadeloupe pa Puerto Rico pensando riba un posibel konekshon mas aleu pa Merka (US). Ku e desaroyonan nobo aki, Digicel ta suprayá su kompromiso den ofresé e mihó red, e mihó servisio i e mihó balor pa e kliente; un biaha mas ta posishoná su mes komo un lider den skohensia di e konsumidó pa e region. En total, Digicel tin un akseso na un red robusto konsistiendo na 15 segmento supmarino, ku un alkanse di algu mas ku 3,100 kilometer den henter region Caribense. Ademas di esaki, Digicel lo tin un kapasidat ekstenso di otro retnan supmarino konektando Miami, Paris i New York. E términonan finansiero di e kontrato no lo wòrdu divulgá i e negosiashonnan ta suheto na un proseso di aprobashon. Sr. Sander Gielen, CEO pa Digicel Dutch Caribbean a komentá, “Digicel semper ta buskando maneranan pa garantisá ku nos por sigui ofresé mas skohensia i inovashon na nos klientenan. E atkisishon di e red supmarino ta sigurá un kapasidat adishonal signifikante pa Digicel. E kapasidat aki ta sentral den nos kontinuo búskeda pa keda ofresé servisionan inovativo i produktonan na nos klientenan den un mundu ku tin hopi ‘hamber’ pa data”.