Willemstad, Kòrsou – Pa fasilitá i protehá e rebendedó Landsloterij ya pa algun tempu a introdusí un sistema di benta mas fásil i lihé teniendo kada un di su rebendedónan den mente.

Promé ku Covid-19 a hasi su entrada na Kòrsou, e úniko manera pa rebendedónan  por a kumpra brièchi pa rebendé tabata via di  e lokètnan na e ofisina di Landsloterij den Breedestraat, Otrabanda. Konsekuentemente un rebendedó mester a bandoná su punto di benta, pa bin Landsloterij pa kumpra brièchi.   Mirando e desaroyonan rondó di Covid -19  di e aña i mei tras di lomba, pa algun tempu kaba Landsloterij ta duna rebendedónan e oportunidat di por kumpra brièchi via telefòn, WhatsApp, òf dor di por depositá pedidonan den e buzon na Landsloterij. Na momentu  ku pedidonan ta kla kada rebendedónan ta haña un orario asigná pa por pasa i rekohé nan pedido na lokèt,  buskadónan via drive thru  òf hasi uzo di Landsloterij su servisio di entrega di brièchi “delivery” te na  nan punto di benta òf kas. Di e forma aki Landsloterij ta trese inovashon nobo i  opshonnan mas rápido, safe i lihé pa su rebendedónan kumpra brièchi. E sistema di benta a prueba di ta sumamente efisiente  pa e rebendedónan.

Mirando ku Landsloterij ta den porta di un sorteo mionario i e demanda pa e sorteo di dia 8 di yüli próksimo ta haltu, por surgi un tiki retraso den entrega. Esaki semper ta e kaso un par di dia promé ku e sorteo popular manera esun di djaweps benidero. E departamento di benta ta hasiendo su máksimo esfuerso pa tur rebendedó por haña nan brièchinan mas rápido posibel segun e orario ku nan a haña asigná pa rekohé nan brièchinan.

Pa mas informashon over di Landsloterij bishitá nos website www.landsloterij.org, nos página di Facebook, sigui nos riba nos paginá di Instagram òf hasi nos un yamada na 4624088.