Selikor ta partisipá ku e kompleho di maneho di shushi na Lèntfel Malpais ta habrí bèk pa públiko. Usuarionan mester tene kuenta ku por eksperiensiá molèster di huma den e área i mester tuma e prekaushonnan nesesario na momentu di bishita Malpais. Ta spera ku pa mañan, djamars 6 di yüli, e situashon lo ta normalisá.

Manera ta konosí, djasabra 3 di yüli, a surgi un kandela na e sitio kaminda ta almasená tayer ku e meta pa resiklahe. Ta bon pa bisa ku e kandela no tabata na e parti kaminda ta basha shushi. E kandela pues no a afektá e áreanan kaminda usuarionan ta bai basha shushi.

Diferente ehersisio ta tumando lugá ainda pa normalisá tur aktividat na e kompleho di maneho di shushi. Tambe ta hasiendo e investigashonnan nesesario pa determiná kousa di e kandela. Pa e motibunan akí Lèntfel Malpais lo ta aksesibel únikamente pa e servisio di depositá shushi. Ta posponé tur otro aktividat na e kompleho temporalmente. Mientras tantu públiko por sigui hiba tayer di forma separá i lo risibí instrukshon di nos personal na kua área por depositá esaki.

Gerensia di Selikor NV ta pidi su diskulpa pa e molèster ku e insidente akí a trese kuné tantu pa usuarionan di Lèntfel Malpais komo pa habitantenan di e barionan den besindario.