Fiesta Fina 31 yüli 2021 na Lánthuis Chobolóbo ……
Tur kos ta mustra ku djasabra 31 yüli próksimo lo bai bira un dia realmente grandi aki na Kórsou, ora Show Latino su ranki Sali den grandi ku é prome evento internashonal p’e aña ku a wordu denominá komo “Fiesta Fina” ku presentashon di nada mas i nada menos ku GRUPO EXTRA den un tremendo fiesta bailable sin presedente.
Grupo Extra ta hopi bon konosí aki na Kórsou pa nan tremendo eksitonan ku a hasi estrágo aki na aña 2018 manera entre otro “Me Emboracharé”, “Hoy se Bébe” i aktualmente tin algun numero sonando ku masha hopi frekuensia na nos emisoranan lokal entre otro “Atravéz del vaso”, “Qué mal hice yó”, “Vén a mi”, “Volvió”, djís pa nombra algun. E grandioso evento aki lo bai tuma luga riba Chobolobo Parking Square na Lánthuis Chobolóbo, kaminda Grupo Extra lo bai komparti ensenario ku nos orguyoso artista lokal internashonal Ephrem J huntu ku su banda i tambe Gentz ku ta e grupo musikal mas kayente na e momentunan aki. Lo tin presentashon speshál tambe di Gigo Martínez na inisio di e programa.
Show Latino no a spar ni ora, ni dia i niun energia i a hasi tur e esfuerso ku tabata nesesario pa logra ku evenimentu aki ku Grupo Extra por a bira un echo, pa asina kumpli ku e soňo di hopi hende di por baila tur nan tremendo eksitonan bíbu riba nos suela i Show Latino tei kumpli ku esaki.
CHOBOLÓBO PARKING SQUARE
Pa e fecha 31 yüli venidero, ta un ambiente uniko lo bai wordu kreá na e bunita lánthuis aki. For di entrada, e publiko ku lo bai asisti na e fiesta aki, lo bai sinti un esfera otro for di normal, pero sumamente agradabel i ku sigur lo bai wordu gusta pa un i tur. Teniendo kuenta ku esaki, e organisashon kier pidi tur ku lo bai tei presente, pa presenta ku un gran humor pa bin disfruta di tur loke lo bai keda prepara pa deleite di uni i tur.
PRUEBA ANTIGEEN PA FL. 20,- NA SITIO DI FIESTA MES
Show Latino asumiendo su responsabilidat i den kuadro di medidanan anunsiá pa ku Covid-19, ta hopi komplasí pa anunsia ku pa tur esnan ku pa nan motibunan no a bakuna, pero sí ta interesa pa forma parti di e ambiente fenomenal aki, lo bai tin e oportunidat pa hasi nan prueba (test) antigeen na Lánthuis Chobolóbo mes riba e anochi di e fiesta mes i risibi nan resultado den apenas algun minút. E kosto mará na e prueba aki, unikamente riba e gran anochi di fiesta aki, lo ta solamente Naf. 20,– pa kortesia di MedCare.
BENTA DI KARCHI NA PREIS SPESHAL DIA 3 YÜLI
Chobolóbo Parking Square lo bai wordu parti den sekshonnan kual nan ta Sekshon General, Sekshon VIP Mesa, VIP Single i tambe un Sekshon apart di VIP Stage, kual lo ta un sekshon hopi limita i ubiká rondó di e ensenario.
Mirando e gran interés pa e presentashon di Grupo Extra, Show Latino ta bai hasi un gesto speshál eksklusívamente riba djasabra venidero 3 yüli na Lánthuis Chobolóbo, kuminsando for di 10or di mainta te ku 1or di atardi lo bai bènde karchinan di sekshon General na Fl. 50,– e preis regular ta Fl. 65,–, Sekshon VIP Single Fl. 75,– ku su balor regular ta Fl. 100,– i Sekshon VIP Mesa na Fl. 225,–i su balor normal ta Fl. 250,–.
Ta bon pa remarká ku ta unikamente riba e dia aki só lo bèndé e karchinan di e diferente sekshonnan na e preis eksepshonalmente redusí aki, pesei ta esun ku bini prome lo bebe awa limpi. Bo mester probecha e oportunidat aki, pa asina garantisa for di awor bo presensia den e tremendo Fiestón aki.
