Union ta e yabi pa solushon.
WILLEMSTAD —
Direktiva di AMAK ta sumamente satisfecho, ku despues di mas ku un aña di lucha, porfin ku despues di e diferente akshonnan di úiltimo simannan, manera e moshon di parlamento, i muy en espesial e intervenshon di parlamentario Gibi Doran, kartanan di protesta, i e otro movimentonan, porfin huma blanku a sali.
No por keda reuni, pone asamblea i sigui diskuti, pero a yega e momento pa tuma desishon, i habri e sektor di un forma responsabel, kaminda tur esnan ku ta envolvi,inkluso músikonan i artistanan, pa karga nan responsabilidat, pa nos por sigui tene e sifranan di kontagio abou.
Mester evita pa demasiado aglomerashon, i mantené aplikashon di reglanan di higiena.
E reunion di djasabra 5 di yüni tabata kayente, ku ekspreshonnan fuerte, pero mester duna rekonosimentu na eMinister sr. Steven Croes i konseheronan, pa den un forma trankil, duna espasio na representantenan farandulero, ku kasi den un forma unánime tabata trese e opinionnan dilanti.
Esaki tabata kisas e motibu, ku awor si a logra.
No tabatin kestion di skor pa logronan personal, pero e mensahenan komún ku tabata bin dilanti di e diferente gruponan di interes, a hasi un bon impreshon, serka esnan ku tin ku tuma e desishon.
Ta bon pa enfatisá e bon trabou ku e tim di krisis a desplegá, pa awor aki e pandemia di Covid na Kòrsou, ta bon kontrolá.
Ounke te ainda tin sierto restrikshonnan pa esnan ku no ta ful bakuná, tòg ta bin un alivio pa e situashon vigente kua kousa reves finansiero pa músikonan i artistanan i trahadornan den horeca.
Pa mas ku un aña privá di por a ekspresá nan mesa den un òf otro forma di arte o pa ehersé nan labor. E hecho ku gran parti di e pueblo aki a bakuná, sigur lo a kontribuÌ ku e kontagio di e sifranan di Covid a keda abou.
Pa e motibu aki direktiva di AMAK ta konsehá tur músiko i artista pa mas tantu posibel bai bakuná. Si enbèrdat na momentu ku 85% di nos poblashon ta bakuná, esei por krea e komunidat sano i salú, ban hasi uso pa duna posibilidat pa bakuná sin tin kosto mará na djé, pa nos aktividatnan farandulero por bolbe re-anunda den forma responsabel.
Manera e kondishonnan athunto ta stipula, tur esnan ku no ta ful bakuná, mester pasa un prueba di “antigen” 24 ora promé ku e evento, pagando un suma di ang.35,-
Finalmente Direktiva di AMAK ke felesita tur nos músikonan i artistanan ku e logro aki, i na mes momento hopi éiksito pa futuro kompromisonan.
Ban mantené positivismo, hasi bon uso di nos kreatividat durante di e periodo di “Post Covid” aki, i ban spera ku aki 3 siman, durante e reunion di evaluashon nos por konstata ku e resultadonan di Covid a keda abou, pa di e forma ei Kòrsou por sigui biba den un ambiente saludabel den e normal nobo.
Direktiva di AMAK